O‘zbekistonda o‘rtacha umr ko‘rish davomiyligi 75,4 yoshga yetdi
So‘nggi 30 yilda o‘zbeklarning umr ko‘rish davomiyligi 9 yilga uzaydi.
Milliy statistika qo‘mitasi ma’lumotlariga ko‘ra, 2025-yil yakunlari bo‘yicha O‘zbekistonda aholining tug‘ilish vaqtida kutilayotgan o‘rtacha umr ko‘rish davomiyligi 75,4 yoshni tashkil etdi.
Statistik ma’lumotlarga ko‘ra, mazkur ko‘rsatkich mustaqillikning ilk yillariga nisbatan sezilarli darajada oshgan. Xususan, 1991-yilda o‘rtacha umr ko‘rish davomiyligi 66,4 yosh bo‘lgan bo‘lsa, 1995-yilda 69,1 yoshga, 2000-yilda esa 70,8 yoshga yetgan.
Keyingi yillarda ham ijobiy o‘sish davom etib, 2005-yilda ushbu ko‘rsatkich 71,8 yoshni, 2010-yilda 73 yoshni, 2015-yilda esa 73,6 yoshni tashkil etgan. 2020-yilda qisqa muddatli pasayish kuzatilib, o‘rtacha umr ko‘rish davomiyligi 73,4 yoshga tushgan bo‘lsa-da, keyingi yillarda yana o‘sish qayd etilgan.
Xususan, 2024-yilda bu ko‘rsatkich 75,1 yoshni tashkil etgan bo‘lsa, 2025-yil yakunlariga ko‘ra 75,4 yoshga yetdi.
Shunday qilib, so‘nggi 30 yildan ortiq davr mobaynida O‘zbekistonda o‘rtacha umr ko‘rish davomiyligi qariyb 9 yilga oshgan.
