Toshkentda Matbuot va OAV xodimlari kuni munosabati bilan media forumi tashkil etildi
“Media haftalik” yakunlari sarhisob qilinib, faol ishtirokchilar taqdirlandi
27-iyun – Matbuot va ommaviy axborot vositalari xodimlari kuni munosabati bilan Toshkent shahrida yilning eng yirik media forumi tashkil etildi.
Forum mamlakatning turli hududlaridan jurnalistlar, blogerlar, vazirlik va idoralar matbuot kotiblari, media ekspertlari hamda kontent yaratuvchilarini bir maydonga jamladi.
Anjuman davomida zamonaviy media makonining bugungi talablari, milliy kontent sifatini oshirish, axborot bilan ishlashning yangi yondashuvlari hamda sohani rivojlantirishning ustuvor yo‘nalishlari muhokama qilindi. Ishtirokchilar media sohasidagi dolzarb masalalar yuzasidan o‘zaro fikr almashib, tajribalari bilan o‘rtoqlashdi.
Forumda O‘zbekiston Respublikasi Prezidenti matbuot kotibi Sherzod Asadov so‘zga chiqib, mamlakatda media sohasini rivojlantirish, professional jurnalistikani qo‘llab-quvvatlash hamda raqobatbardosh milliy kontent yaratish masalalariga alohida e’tibor qaratdi.
Shuningdek, tadbir doirasida joriy yilning 30-martidan 26-iyuniga qadar respublika bo‘ylab ilk bor o‘tkazilgan “Media haftalik” loyihasi yakunlari sarhisob qilinib, eng faol ishtirokchilar taqdirlandi.
Ta’kidlanishicha, media forumi professional muloqot, tajriba almashish va yangi g‘oyalarni ilgari surish maydoniga aylanib, mamlakat media hamjamiyatini sifatli, ishonchli va zamonaviy kontent yaratish yo‘lida yana bir bor birlashtirdi.
