Toshkentda ota farzandi uchun 50 ming dollar aliment to‘ladi
Eʼtiborlisi, ota farzandi uchun 176 mln so‘m aliment belgilangan, biroq u 50 ming AQSH dollari miqdorida aliment to‘lashga qaror qilgan.
Fuqarolik ishlari bo‘yicha Uchtepa tumanlararo sudining buyrug‘iga asosan qarzdor U. X.dan undiruvchi M.X. foydasiga voyaga yetmagan uch nafar farzandi taʼminoti uchun ular voyaga yetgunga qadar har oyda qarzdorning ish haqi va boshqa daromadlarining 1/2 qismi miqdorida aliment undirish belgilangan.
Mazkur ijro hujjati 23.05.2023 yil kuni MIBning Uchtepa tuman bo‘limi ish yurituviga kelib tushib, ijro ishi qo‘zg‘atilgan hamda belgilangan tartibda ijro harakatlari amalga oshirilgan.
Keyinchalik qarzdor ota farzandlarining taʼminoti uchun to‘lanishi lozim bo‘lgan aliment mablag‘larini oldindan hisoblab berishni so‘rab murojaat qilgan.
Shunga ko‘ra, Majburiy ijro byurosining elektron dasturi orqali aliment mablag‘lari 2026 yil 1 apreldan 2031 yil 1 iyulga qadar bo‘lgan davr uchun hisoblanib, jami 176 458 966 so‘m miqdorida aliment to‘lovi belgilangan.
Biroq ota farzandlarining kelajagiga sarmoya sifatida u 50 ming AQSH dollari miqdoridagi mablag‘ni aliment to‘lovi tarzida oldindan to‘lab bergan.
