AQSHda Jahon chempionati o‘yinidan keyingi tantanalar vaqtida otishma yuz berdi
Muxlislar Kabo-Verdening JCHdagi tarixiy g‘alabasini nishonlayotgan bo‘lgan. Otishma oqibatida 4 kishi jarohatlangan.
AQSHning Massachusets shtati Brokton shahrida FIFA Jahon chempionati uchrashuvidan so‘ng yuz bergan otishmada kamida to‘rt kishi yaralandi. Bu haqda NBC Boston xabar berdi.
Brokton politsiyasi ma’lumotiga ko‘ra, hodisa mahalliy vaqt bilan 27-iyun kuni yarim tundan sal oldin Main Street hududida sodir bo‘lgan. O‘sha vaqtda yuzlab odamlar ko‘chada to‘plangan bo‘lib, huquq-tartibot idoralariga bir necha marta o‘q uzilgani haqida xabar kelib tushgan.
Voqea joyiga yetib borgan politsiya Main Street va Park Street chorrahasida o‘qotar quroldan yaralangan kamida to‘rt nafar kishini aniqlagan. Ularning barchasi shifoxonaga yotqizilgan. Jabrlanuvchilarning ahvoli haqida hozircha ma’lumot berilmagan. Hodisa yuzasidan hozircha hech kim qo‘lga olinmagan.
Politsiya olomon aynan qaysi uchrashuv natijasini nishonlayotganiga aniqlik kiritmagan. Biroq Brokton AQSHdagi eng yirik Kabo-Verde diasporasi yashaydigan shaharlardan biri hisoblanadi. Juma oqshomida mahalliy aholi Kabo-Verde terma jamoasining Jahon chempionatida tarixiy natija qayd etganini nishonlagan.
Kabo-Verde Saudiya Arabistoni bilan durang o‘ynab, Jahon chempionati tarixida pley-off bosqichiga chiqqan eng kichik davlatga aylandi. Afrika g‘arbiy sohillari yaqinidagi orol davlati mazkur turnirda ilk bor ishtirok etmoqda.
Ma’lumot o‘rnida Kabo-Verde va Saudiya Arabistoni o‘rtasidagi futbol bahsi Huyuston stadionida bo‘lib o‘tgan.
