Dubayda og‘ir ahvolga tushib qolgan o‘zbekistonlik oila vatanga qaytarildi
Viza muddati tugagani sabab jarimaga tortilgan oila diplomatik muzokaralar natijasida BAAni jarimasiz tark etdi.
O‘zbekistonning Dubay shahridagi Bosh konsulxonasi ko‘magida Birlashgan Arab Amirliklarida og‘ir vaziyatga tushib qolgan o‘zbekistonlik oila vatanga qaytarildi. Bu haqda Dunyo axborot agentligi xabar berdi.
Ma’lum qilinishicha, fuqaro P.G. va uning farzandi A.Z. 2025-yilda mavsumiy ish maqsadida Dubayga borgan. Moliyaviy qiyinchiliklar sababli ular 2026-yil yanvar oyida O‘zbekistonga qaytish uchun aviachiptalar xarid qilgan. Biroq aviareyslarning kechikishi hamda Yaqin Sharqdagi keskin vaziyat tufayli mamlakatni o‘z vaqtida tark eta olmagan.
Natijada ularning BAAda vizasiz qolish muddati tugab, jarimaga tortilgan.
O‘zbekistonning Dubaydagi Bosh konsulxonasi tomonidan Dubay immigratsiya xizmati bilan olib borilgan muzokaralar natijasida fuqarolarga mamlakatni jarima to‘lamasdan tark etish uchun ruxsat olingan.
Shuningdek, diplomatik vakolatxona tashabbusi bilan BAAdagi “Ayollar va bolalarga yordam ko‘rsatish” jamg‘armasi homiyligida oila a’zolari uchun 26-iyun kuni Dubay–Toshkent yo‘nalishi bo‘yicha aviachiptalar xarid qilinib, ularning O‘zbekistonga xavfsiz qaytishi ta’minlangan.
