Estakadadagi ochiq qism nuqson emas — Toshkent metropoliteni
Metropoliten Qo‘yliq–Rohat oralig‘idagi estakada bo‘yicha tarqalgan videolarga izoh berdi.
Ijtimoiy tarmoqlarda Toshkent metropolitenining Yer usti halqa yo‘li yo‘nalishidagi Qo‘yliq va Rohat bekatlari oralig‘ida joylashgan estakada konstruksiyasi xavfli holatda ekani haqida tarqalgan videolar yuzasidan “Toshkent metropoliteni” rasmiy munosabat bildirdi.
Ma’lumotlarga ko‘ra, videoda aks etgan ochiq qism estakada konstruksiyasidagi nuqson yoki yemirilish emas. Ushbu qism loyiha asosida signal va aloqa kabellarini o‘tkazish uchun maxsus ko‘zda tutilgan texnologik o‘tish joyi hisoblanadi.
Qayd etilishicha, mazkur konstruktiv yechim metro poyezdlari harakati yoki estakadaning mustahkamligiga salbiy ta’sir ko‘rsatmaydi. Shuningdek, yo‘lovchilar xavfsizligiga hech qanday tahdid mavjud emas.
“Toshkent metropoliteni” ijtimoiy tarmoq foydalanuvchilarini tasdiqlanmagan va asossiz ma’lumotlarni tarqatmaslikka chaqirdi. Ta’kidlanishicha, yolg‘on yoki tasdiqlanmagan axborotlarni tarqatish fuqarolar orasida asossiz xavotir uyg‘otishi mumkin hamda bunday holatlar uchun amaldagi qonunchilikda javobgarlik belgilangan.
