Qozogʻiston va Oʻzbekiston chegarasidagi ayrim nazorat punktlari 24 soat ishlaydi
Chegaradan oʻtish tartibi soddalashtirilib, oʻtkazuvchanlik quvvati oshiriladi.
Qozogʻiston va Oʻzbekiston oʻrtasidagi chegarani kesib oʻtish tartibi yanada soddalashtiriladi. Bu boradagi tegishli kelishuvga kiritilgan oʻzgartirishlar Qozogʻiston Majlisi tomonidan ratifikatsiya qilindi deb xabar berdi 24.kg.
Kiritilgan oʻzgartirishlarga muvofiq, ikki davlat oʻrtasidagi ayrim avtomobil chegara oʻtkazish punktlari ikki tomonlama maqomdan koʻp tomonlama maqomga oʻtkaziladi. Shuningdek, mazkur nazorat punktlari endilikda faqat kunduzgi vaqtda emas, balki sutkaning 24 soati davomida faoliyat yuritadi.
Qozogʻiston transport vaziri Nurlan Sauranbayevning taʼkidlashicha, ushbu yangilik chegara oʻtkazish punktlarining oʻtkazuvchanlik quvvatini oshirish, yoʻlovchilar uchun qulay sharoit yaratish hamda ikki mamlakat oʻrtasidagi turizm va tranzit yuk tashuvlarini rivojlantirishga xizmat qiladi.
Shuningdek, Transport vazirligi mazkur oʻzgarishlarni amalga oshirish uchun davlat byudjetidan qoʻshimcha mablagʻ ajratilishi talab etilmasligini maʼlum qilgan.
