Toshkent davlat agrar universitetida yong‘in yuz berdi
Yong‘in oqibatida tan jarohati olganlar yo‘q.
Bugun, 28-iyun kuni Toshkent viloyatining Qibray tumanida joylashgan Toshkent davlat agrar universiteti sport majmuasi binosining tom qismida yong‘in yuz berdi.
Favqulodda vaziyatlar xizmatining ma’lum qilishicha, hodisa haqida soat 15:17 da “112” tizimi orqali xabar kelib tushgan. Shundan so‘ng yong‘in-qutqaruv ekipajlari voqea joyiga zudlik bilan yetib borib, yong‘inni 15:59 da qurshab olgan hamda 16:15 da to‘liq bartaraf etgan.
Dastlabki ma’lumotlarga ko‘ra, hodisa oqibatida jabrlanganlar yo‘q.
Ayni paytda yong‘inning kelib chiqish sabablari hamda yetkazilgan moddiy zarar miqdori aniqlanmoqda.
