Toshkentda IV Xalqaro “Umra Plus va ziyorat turizmi” ko‘rgazmasi boshlandi

27-iyun kuni Toshkent shahrida Turizm qo‘mitasi hamda Umra turizmi tashkilotlari assotsiatsiyasi hamkorligida IV Xalqaro “Umra Plus va ziyorat turizmi” ko‘rgazmasi o‘z ishini boshladi.

 

Ko‘rgazmada Markaziy Osiyo davlatlari, Turkiya, Rossiya, Ozarbayjon, Malayziya, Indoneziya va Saudiya Arabistonidan 200 nafardan ortiq turoperator, mehmonxona biznesi hamda transport kompaniyalari vakillari ishtirok etmoqda.

 

Ikki kun davom etadigan tadbir doirasida B2B uchrashuvlari, biznes muzokaralari va O‘zbekistonning turizm salohiyatiga bag‘ishlangan taqdimotlar o‘tkazilib, ziyorat turizmini rivojlantirish hamda xalqaro hamkorlikni kengaytirish masalalari muhokama qilinmoqda.

 

Ko‘rgazmaning ochilish marosimida Turizm qo‘mitasi raisi o‘rinbosari S. Bobokalonov ishtirok etdi. U o‘z nutqida ziyorat turizmini rivojlantirish mamlakat turizm siyosatining ustuvor yo‘nalishlaridan biri ekanini ta’kidlab, mazkur loyiha O‘zbekistonning turizm salohiyatini xalqaro maydonda keng targ‘ib etish, xorijiy ziyoratchilar oqimini oshirish va yangi hamkorlik aloqalarini yo‘lga qo‘yishga xizmat qilishini qayd etgan.

 

Qayd etilishicha, ko‘rgazma avval Turkiya, Malayziya va Indoneziyada o‘tkazilgan taqdimotlarning mantiqiy davomi bo‘lib, O‘zbekistonning tarixiy shaharlari bo‘ylab sayohatni umra safarlari bilan uyg‘unlashtiruvchi “Umra+” dasturini xalqaro miqyosda targ‘ib etishga qaratilgan.

 

Tadbir doirasida yangi “Umra+” yo‘nalishlarini shakllantirish, mahalliy va xorijiy kompaniyalar o‘rtasida hamkorlikni mustahkamlash yuzasidan B2B muzokaralari o‘tkazilmoqda.

 

Yakunda 100 ga yaqin hamkorlik bitimini imzolash rejalashtirilgan.

Shuningdek, xorijiy delegatsiyalar uchun O‘zbekistondagi Islom sivilizatsiyasi markaziga tashrif tashkil etildi. Mazkur markazni xorijiy sayyohlarga tavsiya etiladigan asosiy ziyorat marshrutlari tarkibiga kiritish bo‘yicha ham kelishuvga erishildi.

 

Turizm qo‘mitasi ma’lumotiga ko‘ra, 2026-yilning dastlabki besh oyida O‘zbekistonga 5,3 milliondan ortiq xorijiy sayyoh tashrif buyurgan. Jumladan, Ozarbayjondan kelgan sayyohlar soni qariyb 82 foizga, Malayziyadan ikki baravardan ortiq, Indoneziyadan 63 foizdan ko‘proq, Turkiyadan esa 19 foizga oshgan.