1-iyuldan O’zbekistonda kasallik nafaqalarini to’lashning yangi tartibi joriy etiladi
Vaqtincha mehnatga layoqatsizlik nafaqalari dastlabki besh kun davomida ish beruvchi, oltinchi kundan boshlab esa Davlat ijtimoiy sug’urta jamg’armasi mablag’lari hisobidan moliyalashtiriladi.
2026-yil 1-iyuldan O’zbekistonda kasallik nafaqalarini to’lashning yangi tartibi joriy etiladi. Endilikda vaqtincha mehnatga layoqatsizlik nafaqalari dastlabki besh kun davomida ish beruvchi, oltinchi kundan boshlab esa Davlat ijtimoiy sug’urta jamg’armasi mablag’lari hisobidan moliyalashtiriladi. Bu haqda Ijtimoiy himoya milliy agentligi hamda Ijtimoiy sug’urta jamg’armasi tomonidan o’tkazilgan brifingda ma’lum qilindi.
Ta’kidlanishicha, yangi tizim Prezidentning 2025-yil 3-noyabrdagi PF–206-son Farmoni asosida bosqichma-bosqich joriy etilayotgan davlat ijtimoiy sug’urtasi tizimining navbatdagi bosqichi hisoblanadi.
Brifingda qayd etilishicha, joriy yil boshidan homiladorlik va tug’ish nafaqalarini proaktiv tayinlash tizimi yo’lga qo’yilgan. Shu maqsadda Ijtimoiy sug’urta axborot moduli ishga tushirilib, 10 ta vazirlik va idoraning axborot tizimlari o’zaro integratsiya qilingan.
Natijada yilning dastlabki besh oyida 81 mingdan ortiq mehnatga layoqatsizlik varaqasi avtomatik ko’rib chiqilgan. 58 ming holatda qariyb 660 milliard so’m miqdorida homiladorlik va tug’ish nafaqalari tayinlanib, to’lab berilgan.
Shuningdek, xususiy sektorda ishlayotgan ayollarga to’langan homiladorlik va tug’ish nafaqasi hajmi o’tgan yilga nisbatan sezilarli oshgani ta’kidlandi. Bir nafar ayolga to’lanadigan o’rtacha nafaqa miqdori 2,6 million so’mdan 14,8 million so’mgacha ko’paygan.
Yangi tizimga ko’ra:
kasallikning dastlabki 5 kuni uchun nafaqani ish beruvchi to’laydi;
6-kundan boshlab to’lovlar Davlat ijtimoiy sug’urta jamg’armasi mablag’lari hisobidan amalga oshiriladi;
6 oydan 8 yilgacha sug’urta stajiga ega fuqarolarga o’rtacha ish haqining 60 foizi;
8 yildan ortiq stajga ega fuqarolarga esa 80 foizi miqdorida nafaqa to’lanadi.
Bundan tashqari, I va II guruh nogironligi bo’lgan shaxslar, 18 yoshgacha to’rt va undan ortiq farzandi bor oilalar hamda nogironligi bo’lgan farzandni tarbiyalayotgan oilalar uchun nafaqa miqdori yana 20 foizga oshiriladi.
