AQSh O‘zbekiston xalqaro aeroportlariga zamonaviy portlovchi moddalarni aniqlash uskunalarini taqdim etdi
Yangi uskunalar O‘zbekistonning barcha xalqaro aeroportlarida bagaj, yuk va qo‘l yuklarini tekshirishda qo‘llanilib, aviatsiya xavfsizligini yanada kuchaytiradi.
O‘zbekiston xalqaro aeroportlarida aviatsiya xavfsizligini yanada kuchaytirish maqsadida AQSh hukumati tomonidan zamonaviy portlovchi moddalarni aniqlash uskunalari beg‘araz asosda taqdim etildi. Bu haqda “O‘zbekiston aeroportlari” AJ ma’lum qildi.
Qayd etilishicha, AQShning Eksport nazorati va chegara xavfsizligi (EXBS) dasturi doirasida O‘zbekistonga 12 ta LEIDOS rusumidagi portlovchi moddalar izlarini aniqlash qurilmasi topshirilgan. Mazkur uskunalar O‘zbekistondagi AQSh elchixonasi hamda AQSh Transport xavfsizligi boshqarmasi (TSA) bilan olib borilgan hamkorlik va maslahatlashuvlar natijasida taqdim etilgan.
Yangi uskunalar respublikaning barcha xalqaro aeroportlarida yuklar, pochta jo‘natmalari, ro‘yxatdan o‘tkazilgan bagaj hamda yo‘lovchilarning qo‘l yuklarini tekshirish jarayonida portlovchi moddalar izlarini aniqlash uchun foydalaniladi.
“O‘zbekiston aeroportlari” AJ ma’lumotiga ko‘ra, LEIDOS analizatorlarining joriy etilishi skrining jarayonlarini takomillashtirish, aviatsiya xavfsizligini yanada mustahkamlash hamda mamlakat aeroportlarining xalqaro aviatsiya xavfsizligi standartlari va tavsiya etilgan amaliyotlarga muvofiqligini ta’minlashga xizmat qiladi.
“O‘zbekiston aeroportlari” AJ raisining aviatsiya xavfsizligi va qo‘riqlash rejimi bo‘yicha o‘rinbosari Behzod Yusupov AQSh bilan yo‘lga qo‘yilgan samarali hamkorlik zamonaviy texnologiyalarni joriy etish, aviatsiya xavfsizligi sohasidagi mutaxassislarning kasbiy salohiyatini oshirish va qo‘shma loyihalarni amalga oshirishda muhim ahamiyat kasb etayotganini ta’kidladi.
Mazkur uskunalar AQSh hukumatining EXBS dasturi doirasida bepul taqdim etilgan bo‘lib, ushbu dastur hamkor davlatlarda eksport nazoratini takomillashtirish, chegara xavfsizligini mustahkamlash hamda strategik savdo boshqaruvini rivojlantirishni qo‘llab-quvvatlaydi.
Shuningdek, “O‘zbekiston aeroportlari” AJ kelgusida ham AQShning tegishli idoralari bilan hamkorlikni kengaytirish, tajriba almashish, aviatsiya xavfsizligi infratuzilmasini modernizatsiya qilish va ikki davlat o‘rtasidagi strategik sheriklikni yanada rivojlantirish bo‘yicha qo‘shma loyihalarni davom ettirish rejalashtirilayotganini ma’lum qildi.
