Janubiy Koreya terma jamoasi bosh murabbiyi iste’foga chiqdi
Murabbiy jamoa mundial pley-offiga chiqa olmagani uchun mas’uliyatni o‘z zimmasiga olib, muxlislardan uzr so‘radi.
Janubiy Koreya milliy terma jamoasi bosh murabbiyi Xong Myon Bo 2026-yilgi FIFA Jahon chempionatida jamoa muvaffaqiyatsiz ishtirok etgani ortidan lavozimini tark etishini ma’lum qildi. Bu haqda Yonhap ma'lum qildi.
Murabbiy ommaviy axborot vositalariga bergan bayonotida muxlislardan uzr so‘rab, natijalar uchun to‘liq mas’uliyatni o‘z zimmasiga olishini ta’kidlagan.
“Bugun Janubiy Koreya erkaklar terma jamoasi bosh murabbiyi lavozimidan ketayotganimni e’lon qilaman. Milliy jamoani qo‘llab-quvvatlagan barcha muxlislardan uzr so‘rayman. Biz kutilgan natijaga erisha olmadik va buning uchun barcha javobgarlik menga tegishli”, — degan Xong Myon Bo.
57 yoshli mutaxassisning amaldagi shartnomasi 2027-yilgacha mo‘ljallangan edi. Biroq terma jamoaning Jahon chempionatidagi muvaffaqiyatsiz ishtiroki ortidan u muddatidan avval iste’foga chiqishga qaror qilgan.
Janubiy Koreya terma jamoasi guruh bosqichini 3 ochko bilan uchinchi o‘rinda yakunlab, pley-off bosqichiga yo‘l ola olmadi. Jamoa guruh bahslarida Chexiyani 2:1 hisobida mag‘lub etgan bo‘lsa, Meksika va Janubiy Afrikaga 0:1 hisobida imkoniyatni boy berdi.
Ma’lumot uchun, Janubiy Koreya tarixda 12 marta FIFA Jahon chempionatida ishtirok etgan ilk Osiyo terma jamoasi hisoblanadi. 2026-yilgi mundial esa AQSh, Kanada va Meksika mezbonligida 48 ta terma jamoa ishtirokida o‘tkazilmoqda.
