O‘zbekistonda talabalar turar joylari sotuvga qo‘yildimi?

Oliy ta’lim, fan va innovatsiyalar vazirligi ijtimoiy tarmoqlarda tarqalgan talabalar turar joylari sotuvga qo‘yilgani haqidagi xabarlar yuzasidan rasmiy bayonot berdi.

 

Vazirlik ma’lumotiga ko‘ra, ommaviy savdolarga talabalar yashaydigan xonalar emas, balki talabalar turar joylari tarkibidagi bo‘sh turgan yerto‘la, hovli qismi, oshxona, bufet hamda yotoq joyi sifatida foydalanilmaydigan boshqa yordamchi maydonlarni ijaraga berish uchun e’lonlar joylashtirilgan.

 

Xususan, Samarqand davlat tibbiyot universitetidagi talabalar turar joyining hovli qismidagi 69,8 kvadrat metr bo‘sh maydon, Farg‘ona davlat universitetidagi yerto‘ladagi 40 kvadrat metrlik xona, Guliston davlat universitetidagi 37 va 52 kvadrat metrlik bo‘sh xonalar, Urganch davlat universitetidagi 36 kvadrat metrlik oshxona, Farg‘ona davlat texnika universitetidagi oshxona binosi hamda Termiz davlat universiteti hududidagi texnologik maydon ommaviy savdolar orqali ijaraga berish uchun chiqarilgan.

 

Qayd etilishicha, mazkur obyektlar talabalar yashash joylari hisoblanmaydi va ularni ijaraga berish talabalar turar joylaridagi o‘rinlar sonining qisqarishiga olib kelmaydi.

 

Vazirlik, shuningdek, O‘zbekiston Respublikasi Prezidentining 2025-yil 30-yanvardagi PF–16-son farmoniga muvofiq, 2025-yilda davlat-xususiy sheriklik asosida 8 ming o‘rinli talabalar turar joylarini barpo etish vazifasi belgilanganini eslatdi. Yil yakunida esa jami 11 ming 84 o‘rinli talabalar turar joylari tashkil etilib, belgilangan reja 138,6 foizga bajarilgani qayd etildi.

 

Ma’lumotlarga ko‘ra, 2022–2025-yillar davomida respublika bo‘yicha jami 74,1 ming o‘rinli talabalar turar joylari yaratilgan. Natijada davlat oliy ta’lim muassasalaridagi yotoqxonalarning umumiy sig‘imi 159,1 ming o‘ringa yetkazilib, talabalarning yotoqxona bilan ta’minlanish darajasi 58 foizni tashkil etgan.

 

Vazirlik 2026-yilda respublika bo‘yicha yana 12 ming 110 o‘rinli yangi talabalar turar joylarini qurib, foydalanishga topshirish rejalashtirilganini ham ma’lum qildi.