Xorazmda fermer mashinasi xatlangach, soliq qarzini to‘ladi
Maʼlum bo‘lishicha, fermer xo‘jaligida 180 mln so‘m soliq qarzi bo‘lgan.
Majburiy ijro byurosi Urganch tumani bo‘limi ish yurituvidagi ijro hujjatlariga asosan qarzdor “X.Ch.” fermer xo‘jaligidan jami 180,0 mln so‘m soliq va boshqa turdagi qarzlarini undirish bilan bog‘liq 9 ta ijro hujjati bo‘yicha olib borilgan ijro harakatlari davomida qarzdorga tegishli “Zil” va “Class Oreon” rusumli avtotransport vositalariga nisbatan qidiruv eʼlon qilingan.
Boshqarmaning qidiruv shoʻbasi tomonidan olib borilgan qidiruv harakatlari natijasida mazkur avtotransport vositalari topilib, “Zil” rusumli avtotransport vositasi jarima maydonchasiga qo‘yilgan.
Shuningdek, “Class Oreon” rusumli avtotransport vositasi topilib xatlangandan so‘ng, qarzdor fermer xo‘jaligi rahbari tomonidan 120,0 mln so‘m soliq qarzdorligi to‘lab berilgan.
Hozirda qolgan ijro hujjatlari bo‘yicha qoldiq qarzdorlikni undirish maqsadida qarzdorga tegishli avtotransport vositalarini realizatsiya qilish choralari ko‘rilmoqda.
