Farg‘onada Ekologiya bo‘limi xodimi 9500 dollar pora bilan ushlandi
Mansabdor daraxtlar kesilishiga chora ko‘rmaslik evaziga pul talab qilgan.
Farg‘ona viloyati Buvayda tumanida ekologiya sohasida korrupsiyaga oid holat fosh etildi. Tezkor tadbir davomida mansabdor shaxs pora olayotgan vaqtida ashyoviy dalillar bilan qo‘lga olindi. Bu haqda viloyat Ichki ishlar boshqarmasi matbuot xizmati ma’lum qildi.
Dastlabki tergovga qadar tekshiruv materiallariga ko‘ra, tuman ekologiya bo‘limi xodimi “Arab” mahallasi hududidagi 4 gektar yer maydonida joylashgan yovvoyi daraxtlarning kesilishi hamda hududning qumdan tozalanishiga nisbatan bir yil davomida chora ko‘rmaslik evaziga fuqarodan 10 ming AQSH dollari talab qilgan.
Viloyat IIB hamda boshqa huquqni muhofaza qiluvchi organlar hamkorligida o‘tkazilgan tezkor tadbirda porani olishda vositachilik qilgan shaxs va mansabdor ekologiya xodimi 9 500 AQSH dollari miqdoridagi pul mablag‘ini olayotgan vaqtida ashyoviy dalillar bilan ushlangan.
Shuningdek, vositachi boshqaruvidagi avtomashina ko‘zdan kechirilganda, giyohvandlik vositasiga o‘xshash moddalar aniqlanib, ular belgilangan tartibda daliliy ashyo sifatida rasmiylashtirilgan.
Mazkur holat yuzasidan Jinoyat kodeksining 168-moddasi (firibgarlik) hamda 211-moddasi bilan bog‘liq holatlar yuzasidan jinoyat ishi qo‘zg‘atilib, dastlabki tergov harakatlari olib borilmoqda.
