“Milliy terma jamoani tanqid emas, qo‘llab-quvvatlash kerak” — Shavkat Mirziyoyev
Davlat rahbari futbolni rivojlantirish, investitsiyalarni ko‘paytirish va bolalar futboliga alohida e’tibor qaratilishini ma’lum qildi.
Prezident Shavkat Mirziyoyev yoshlar bilan uchrashuvda O‘zbekiston milliy futbol terma jamoasining FIFA Jahon chempionatidagi ishtirokiga alohida to‘xtalib, futbolchilarni qo‘llab-quvvatlash muhimligini ta’kidladi.
Davlat rahbari qayd etganidek, milliy terma jamoaning AQSh va Meksika maydonlaridagi o‘yinlarini butun xalq katta hayajon bilan kuzatdi. Davlat rahbarining so'zlariga ko‘ra, FIFA reytingida yuqori o‘rinlarni egallab turgan Portugaliya, Kolumbiya hamda tarkibida Yevropaning yetakchi klublarida to‘p surayotgan futbolchilar jamlangan Kongo terma jamoalariga qarshi uchrashuvlar futbolchilar uchun muhim tajriba maktabi bo‘ldi.
Prezident Abbos Fayzullayev va Eldor Shomurodovning Jahon chempionatidagi ilk gollari xalqimizga katta quvonch bag‘ishlaganini alohida e’tirof etdi.
Davlat rahbari milliy terma jamoaning mundialdagi ishtiroki yuzasidan turli fikrlar bildirilayotganiga to‘xtalar ekan, Vatan sharafini himoya qilgan futbolchilarga ortiqcha e’tiroz bildirish va ulardan ayb izlash xalqimizga xos emasligini ta’kidladi.
“Aksincha, bugun ularni qo‘llab-quvvatlash, ruhini ko‘tarish har qachongidan ham muhim”, — dedi Prezident.
Shuningdek, katta g‘alabalar hali oldinda ekani, buning uchun futbol infratuzilmasini rivojlantirish, sohaga investitsiyalarni ko‘paytirish va bolalar futboliga alohida e’tibor qaratish zarurligi qayd etildi. Ta’kidlanishicha, bolalar futboli umummilliy harakatga aylantiriladi.
Prezident kelasi yil yanvar oyida Saudiya Arabistonida bo‘lib o‘tadigan futbol bo‘yicha Osiyo kubogiga tayyorgarlik ishlari hozirdanoq boshlanishini ma’lum qildi.
So‘ngida davlat rahbari: “Biz jamoamizga ishonamiz va ushbu musobaqada ham butun xalqimiz bilan qo‘llab-quvvatlaymiz!” deya ta’kidladi.
