Oliygoh bitiruvchilarini ishga olgan tadbirkorlarga bir yillik soliq imtiyozi beriladi

 

Yoshlar bilan uchrashuvda Prezident Shavkat Mirziyoyev oliy ta’lim muassasalari bitiruvchilarining bandligini ta’minlash, ehtiyojmand yoshlarni qo‘llab-quvvatlash hamda yoshlar tadbirkorligini rivojlantirishga qaratilgan qator yangi tashabbuslarni ma’lum qildi.

 

Davlat rahbarining ta’kidlashicha, oliygoh bitiruvchilarini ishga qabul qilgan tadbirkorlar uchun yosh mutaxassisga nisbatan daromad solig‘i va ijtimoiy soliq stavkasi bir yil davomida 1 foiz etib belgilanadi. Ushbu imtiyoz 200 mingga yaqin oliy ta’lim muassasasi bitiruvchisini ish bilan ta’minlayotgan tadbirkorlar uchun muhim rag‘bat bo‘lishi qayd etildi.

 

Shuningdek, ijtimoiy reyestrga kirmagan, biroq ota-ona qaramog‘idan mahrum bo‘lgan, harbiy xizmatni o‘tab qaytgan, mehnat migratsiyasidan qaytgan hamda jismoniy imkoniyati cheklangan qariyb 1 million nafar yosh bilan ishlash maqsadida "Kafolatlangan birinchi qadam" paketi joriy etilishi ma’lum qilindi.

 

Mazkur tashabbus doirasida "ustoz–talaba" dasturi ham yo‘lga qo‘yiladi. Unga ko‘ra, uyushmagan yoshlarni oliy ta’limga tayyorlagan talabalarga magistraturaga kirishda qo‘shimcha ball beriladi hamda davlat stipendiyalarini olishda ustuvorlik ta’minlanadi.

 

Prezident bugungi kunda savdo, xizmat ko‘rsatish va ishlab chiqarish yo‘nalishlarida o‘z brendini yaratgan minglab yosh tadbirkorlar faoliyat yuritayotganini qayd etib, ularni tajribasini boshqa yoshlar bilan bo‘lishishga chaqirdi.

 

Shu maqsadda "Yoshlar mini-franshizasi" dasturi ishga tushiriladi. Dastur doirasida faoliyatini kengaytirayotgan yosh tadbirkorlarga imtiyozli shartlarda yer maydonlari va kreditlar ajratiladi.

 

Bundan tashqari, mahalliy brendlar franshizasini xarid qiladigan yoshlar uchun Yoshlar tadbirkorligi jamg‘armasi hisobidan 300 million so‘mgacha foizsiz ssuda ajratilishi belgilandi.

 

Qayd etilishicha, ushbu dasturlarni moliyalashtirish uchun 500 milliard so‘m mablag‘ yo‘naltiriladi.