O'zbekistonda kasblarga o‘qitadigan “Kelajak bilimlari ekotizimi” yo‘lga qo‘yiladi

 

Prezident Shavkat Mirziyoyev yoshlar bilan uchrashuvda mamlakatda zamonaviy bilim, kasb va texnologiyalarni egallagan yoshlar safini kengaytirishga qaratilgan yangi tashabbuslarni e’lon qildi.

 

Davlat rahbari bugungi muvaffaqiyat va ertangi taraqqiyotning poydevori uchta asosiy ustunga – bilim, kasb va texnologiyaga tayanishini ta’kidladi.

 

Shu maqsadda har yili 500 ming nafar yoshni zamonaviy kasblarga o‘qitishga xizmat qiladigan “Kelajak bilimlari ekotizimi” yo‘lga qo‘yiladi.

 

Hududlarda o‘quv markazlari tashkil etish istagidagi yoshlarga davlat tomonidan keng ko‘lamli imtiyozlar yaratiladi. Xususan, o‘quv markazlari qurish uchun yer maydonlari va davlat obyektlari imtiyozli narxlarda auksion orqali taqdim etiladi. To‘lovlarni besh yil davomida foizsiz bo‘lib-bo‘lib amalga oshirish imkoniyati yaratiladi, zarur infratuzilma esa davlat hisobidan barpo etiladi.

 

Bundan tashqari, o‘quv markazlarini qurish va zamonaviy jihozlash uchun ajratiladigan kreditlarning foiz stavkasining 7 foizi davlat tomonidan qoplab beriladi. Agar o‘quv markazlari xorijning ilg‘or ta’lim dasturlari va malakali mutaxassislarini jalb qilsa, ushbu xarajatlarning yarmi ham davlat tomonidan moliyalashtiriladi.

 

Prezident tashabbusiga ko‘ra, zamonaviy kasblarni xalqaro talablar asosida egallash istagidagi yoshlarga “kasb vaucheri” joriy etiladi. Foizsiz ssuda shaklida beriladigan ushbu vaucher orqali har yili 50 ming nafar yoshning kasb o‘rganish xarajatlari qoplanadi.

 

Shuningdek, ehtiyojmand oilalardagi 85 ming nafar ishsiz yosh xususiy o‘quv markazlarida kasb egallashi uchun bepul vaucher bilan ta’minlanadi. Joriy yilning o‘zida ushbu dasturlarni moliyalashtirish uchun 120 milliard so‘m ajratilishi, talab ortib borishi bilan mablag‘ hajmi ham oshirilishi ma’lum qilindi.

 

Davlat rahbari xorijiy til sertifikatini olgan yoshlarning xarajatlarini qoplash amaliyoti o‘zini oqlaganini qayd etib, endilikda ushbu tizimni xalqaro kasb sertifikatlarini qo‘lga kiritgan yoshlarga ham tatbiq etish taklifini ilgari surdi.

 

Yoshlarni kasbga tayyorlashda muhim o‘rin tutadigan texnikumlar faoliyatida ham xususiy sektor ishtiroki kengaytiriladi. Buning uchun xususiy texnikumlar ochishdagi litsenziya talablari soddalashtirilib, 20 dan ortiq ortiqcha talab bekor qilinadi. Yangi o‘quv yilidan boshlab xususiy texnikumlarga ham kasb-hunar ta’limi bo‘yicha davlat grantlari ajratiladi.

 

Shuningdek, xalqaro kasb tanlovlarida g‘olib bo‘lgan davlat va xususiy texnikum o‘quvchilari 100 million so‘m, ularni tayyorlagan ustozlar esa 50 million so‘m miqdorida mukofot bilan taqdirlanadi.