Pokistonda o‘quv markazi tomi qulashi oqibatida 14 nafar bola halok bo‘ldi
Pokiston Prezidenti halok bo‘lganlarning yaqinlariga hamdardlik bildirib, jarohatlanganlarning tezroq sog‘ayishini tiladi.
Pokistonning sharqidagi Lahor shahrida qurilishi davom etayotgan xususiy o‘quv markazi binosi tomi qulashi oqibatida kamida 14 nafar maktab o‘quvchisi halok bo‘ldi. Yana sakkiz nafar bola turli darajada tan jarohati olib, shifoxonaga yotqizilgan. Bu haqda AP xabar berdi.
Politsiya ma’lumotiga ko‘ra, qutqaruvchilar vayronalar ostida qolganlarni qidirish ishlarini davom ettirmoqda. Dastlabki ma’lumotlarda yana bir necha bola vayronalar ostida bo‘lishi mumkinligi aytilgan.
Huquq-tartibot idoralari hodisa yuzasidan o‘quv markazi egasi va yana bir kishini qo‘lga olgan. Tergovning dastlabki xulosalariga ko‘ra, o‘quv markazi eski binoda faoliyat yuritgan, qurilishi yakunlanmagan ikkinchi qavat tomi esa sifatsiz qurilish ishlari sabab qulagan bo‘lishi mumkin.
Pokiston Prezidenti Osif Ali Zardoriy halok bo‘lganlarning yaqinlariga hamdardlik bildirib, jarohatlanganlarning tezroq sog‘ayishini tiladi. U, shuningdek, bunday fojialarning oldini olish uchun qurilish xavfsizligi talablariga qat’iy rioya etish zarurligini ta’kidladi.
Pokistonda qurilish me’yorlariga rioya etilmasligi, sifatsiz qurilish materiallaridan foydalanish va xavfsizlik qoidalarining buzilishi sabab binolar qulashi bilan bog‘liq hodisalar vaqti-vaqti bilan sodir bo‘lib turadi.
