Toshkentda Markaziy Osiyo ekologiya va atrof-muhit tadqiqotlari markazi ochiladi

 

O‘zbekiston Prezidentining ekologiya masalalari bo‘yicha maslahatchisi, Ekologiya va iqlim o‘zgarishi milliy qo‘mitasi raisi Aziz Abduhakimov boshchiligidagi delegatsiya Xitoyning Urumchi shahrida bo‘lib o‘tgan Xitoy va Markaziy Osiyo mamlakatlari davlat ilmiy-tadqiqot muassasalari rahbarlarining muloqot mexanizmi birinchi yig‘ilishida ishtirok etdi. Bu haqda Ekologiya va iqlim o'zgarishi milliy qo'mitasi matbuot xizmati xabar berdi.

 

Tadbirning ochilishida Xitoy fanlar akademiyasi vitse-prezidenti HE Hongping va Shinjon ekologiya va geografiya instituti bosh direktori Chjan Yuanmin so‘zga chiqdi.

 

Tadbirda mintaqa davlatlari o‘rtasida ilmiy hamkorlikni rivojlantirish, tadqiqot natijalari va sun’iy yo‘ldosh ma’lumotlari almashinuvini yo‘lga qo‘yish, shuningdek, atrof-muhitni muhofaza qilish, yerlar degradatsiyasi, cho‘llanish hamda tuproq sho‘rlanishiga qarshi kurashish bo‘yicha qo‘shma loyihalarni amalga oshirish masalalari muhokama qilindi.

 

Yig‘ilish ishtirokchilari mazkur muloqot mexanizmi 2025-yil iyun oyida Ostona shahrida o‘tkazilgan "Markaziy Osiyo – Xitoy" ikkinchi sammitida erishilgan kelishuvlarning amaliy natijasi ekanini ta’kidladilar.

 

Xitoy tomoni O‘zbekistonda amalga oshirilayotgan ekologik siyosat va "yashil" rivojlanish yo‘nalishidagi islohotlarni yuqori baholab, mamlakatda atrof-muhitni muhofaza qilish hamda issiqxona gazlari chiqindilarini kamaytirish borasida izchil ishlar olib borilayotganini qayd etdi.

 

Shuningdek, Shinjon ekologiya va geografiya instituti ko‘magida Toshkent shahridagi "Green University" bazasida Markaziy Osiyo ekologiya va atrof-muhit tadqiqotlari markazini tashkil etish muhim qadam sifatida e’tirof etildi. Qayd etilishicha, ushbu markaz ikki mamlakat o‘rtasidagi ilmiy hamkorlikni yanada mustahkamlash, ekologik va iqlimiy muammolar bo‘yicha zamonaviy ilmiy platformani shakllantirishga xizmat qiladi.