“Yoshlar bilan bog‘liq barcha masalalar hal bo‘ldi, deb bo‘lmaydi” — Shavkat Mirziyoyev
Prezidentning ta’kidlashicha, so‘nggi ikki yilda yoshlar jinoyatchiligi 2,5 barobarga kamaygan.
Prezident Shavkat Mirziyoyev Yoshlar kuni munosabati bilan o‘tkazilayotgan uchrashuvda mamlakatimiz yoshlarini bayram bilan samimiy tabriklab, yoshlarni har tomonlama qo‘llab-quvvatlash davlat siyosatining ustuvor yo‘nalishlaridan biri bo‘lib qolishini ta’kidladi.
Qayd etilishicha, bugungi kunda mamlakatning har bir mahallasida yoshlar tashabbuslarini qo‘llab-quvvatlaydigan yoshlar yetakchilari faoliyati yo‘lga qo‘yilgan. Shuningdek, har haftaning payshanba kuni “Yoshlar kuni” deb e’lon qilinib, vazirlik va idoralar hamda mahalliy hokimliklar yoshlar muammolarini o‘rganish va ularni hal etishga safarbar etilgan.
Prezidentning ta’kidlashicha, amalga oshirilgan islohotlar natijasida yoshlar bilan ishlash tizimi tubdan yangilandi. Xususan, “Yoshlar daftari” orqali bilim olish, kasb-hunar egallash, xorijiy tillarni o‘rganish, ishga joylashish va tadbirkorlik faoliyatini boshlashda qiyinchilikka duch kelgan 1,5 million nafar yoshning muammolari hal etildi.
Shuningdek, yosh tadbirkorlar soni besh barobarga oshib, 287 ming nafardan ortdi. O‘quv markazlari faoliyati uchun yaratilgan qulay sharoitlar natijasida xorijiy tillarni intensiv o‘rganayotgan yoshlar soni 3,5 million nafarga yetdi.
Prezident yoshlarning xalqaro maydondagi yutuqlariga ham alohida to‘xtalib, o‘quvchi va talabalar nufuzli fan olimpiadalarida 434 ta, yosh sportchilar esa xalqaro musobaqalarda 2 ming 245 ta medalni qo‘lga kiritganini qayd etdi.
Bundan tashqari, tarbiyasi og‘ir yoshlar bilan manzilli ishlash tizimi joriy etilgani natijasida so‘nggi ikki yil ichida yoshlar jinoyatchiligi 2,5 barobarga kamaygani ta’kidlandi.
Shu bilan birga, davlat rahbari bu natijalar yoshlar bilan bog‘liq barcha masalalar to‘liq hal etilganini anglatmasligini qayd etdi. U yoshlar masalalari uchun mas’ul vazirlik va idoralar, hokimlar, oliy ta’lim muassasalari rektorlari, texnikum va maktab rahbarlari yoshlarning muammolari, ehtiyojlari va qiziqishlarini doimiy o‘rganib, ular bilan tizimli ishlashi zarurligini ta’kidladi.
