Farg‘onada voyaga yetmagan bola kuchuk bolasini kanalga tashladi
Holat yuzasidan uning onasi jarimaga tortildi.
Ijtimoiy tarmoqlarda kuchuk bolasiga nisbatan shafqatsiz munosabat aks etgan videotasvir yuzasidan Farg‘ona viloyati Ekologiya va iqlim o‘zgarishi bosh boshqarmasi rasmiy ma’lumot berdi.
Qayd etilishicha, holat yuzasidan Toshloq tumani Ekopolitsiya hamda tuman Ichki ishlar bo‘limi xodimlari tomonidan tezkor o‘rganish ishlari olib borilgan.
O‘rganishlar davomida kuchuk bolasini Katta Farg‘ona kanaliga tashlagan shaxs Toshloq tumani Bo‘ston mahallasida yashovchi fuqaro I.S. ekani aniqlangan. Ma’lum bo‘lishicha, u voyaga yetmagan shaxs hisoblanadi.
Shu munosabat bilan amaldagi qonunchilikka muvofiq, voyaga yetmaganning onasi H.N.ga nisbatan Ma’muriy javobgarlik to‘g‘risidagi kodeksning 47-moddasi 1-qismi asosida bazaviy hisoblash miqdorining 5 baravari, ya’ni 2 million 60 ming so‘m miqdorida jarima jazosi qo‘llanilgan.
Bundan tashqari, voyaga yetmagan shaxs bilan profilaktik suhbat o‘tkazilib, bunday holatlarning takrorlanishiga yo‘l qo‘ymaslik yuzasidan Toshloq tumani IIB tomonidan nazorat o‘rnatilgan.
