Koreyaning ilg‘or tajribasi o‘rganilmoqda: MBFTI vakillari xalqaro treningda

Tibbiyot va farmatsevtika tarmog‘ini rivojlantirish agentligi ko‘magida Milliy biofarmatsevtika ilmiy-tadqiqot instituti mutaxassislari Koreya Respublikasida tashkil etilgan “Biologik preparatlarni ishlab chiqish va ishlab chiqarish bo‘yicha kirish kursi” xalqaro trening dasturida muvaffaqiyatli ishtirok etib, uni yakunladilar.

 

Mazkur trening biofarmatsevtika yo‘nalishida ilg‘or bilim va amaliy ko‘nikmalarni mustahkamlash, zamonaviy ishlab chiqarish texnologiyalarini o‘rganish hamda xalqaro tajriba almashuvini kengaytirishga xizmat qildi.

 

Trening davomida ishtirokchilar biologik dori vositalarini yaratish va ishlab chiqarishning asosiy bosqichlari, preklinik tadqiqotlarni tashkil etish, sifat nazorati tizimlari, innovatsion biofarmatsevtik yondashuvlar hamda Koreyaning ushbu yo‘nalishdagi ilg‘or tajribalari bilan yaqindan tanishdilar.

 

Shuningdek, dastur doirasida Koreyaning yetakchi biofarmatsevtika kompaniyalari va ilmiy-tadqiqot markazlariga tashriflar amalga oshirilib, zamonaviy laboratoriyalar faoliyati, ishlab chiqarish infratuzilmasi, texnologik jarayonlar hamda biotexnologik startaplarni rivojlantirish mexanizmlari atroflicha o‘rganildi.

 

Ushbu xalqaro trening Milliy biofarmatsevtika ilmiy-tadqiqot instituti ilmiy salohiyatini yanada oshirish, biofarmatsevtika yo‘nalishida zamonaviy innovatsiyalarni joriy etish va xalqaro hamkorlik aloqalarini mustahkamlashda muhim bosqich bo‘ldi.