Malayziyada hibsga olingan 3 o‘zbekistonlikning o‘lim jazosi bekor qilingan — TIV
Tashqi ishlar vazirligi Malayziyada o‘limga hukm qilingan uch nafar o‘zbekistonlik haqida ma’lumot berdi.
So‘nggi kunlarda ommaviy axborot vositalari va ijtimoiy tarmoqlarda Malayziyaga sayohatga borgan uch nafar o‘zbekistonlikning o‘lim jazosiga hukm qilingani haqidagi videointervyu keng muhokamalarga sabab bo‘ldi.
Mazkur holat yuzasidan Tashqi ishlar vazirligi matbuot kotibi Zamon.uz'ga rasmiy ma’lumot taqdim etdi.
Qayd etilishicha, 2010-yil sentabr oyida O‘zbekiston fuqarolari N.S., N.D. va J.J. Kuala-Lumpur xalqaro aeroportida 12 kilogrammdan ortiq giyohvandlik vositalarini olib o‘tishga uringan vaqtida Malayziya huquqni muhofaza qiluvchi organlari tomonidan qo‘lga olingan.
Keyinchalik Malayziya sudi ularning har biriga nisbatan o‘lim jazosi tayinlagan.
Fuqarolarning huquq va qonuniy manfaatlarini himoya qilish maqsadida O‘zbekistonning Malayziyadagi elchixonasi tomonidan 2013, 2014, 2016 va 2020-yillarda Malayziya Tashqi ishlar vazirligi, Bosh prokuraturasi, Oliy sudi hamda mamlakat Qiroliga ularni afv etish yuzasidan bir necha bor rasmiy murojaatlar yuborilgan.
Ma’lum qilinishicha, 2018-yilda Malayziyada o‘lim jazosini ijro etishga moratoriy joriy etilgan. Shundan so‘ng, 2024-yil 18-martdan kuchga kirgan "O‘lim va umrbod ozodlikdan mahrum qilish jazolarini olgan shaxslarning ishlarini qayta ko‘rib chiqish to‘g‘risida"gi qonun asosida Malayziya Oliy sudi mazkur uch nafar O‘zbekiston fuqarosiga nisbatan chiqarilgan o‘lim jazosini 30 yil muddatga ozodlikdan mahrum qilish jazosi bilan almashtirgan.
Malayziya qonunchiligiga muvofiq, jazoni ijro etish tartibi va yaxshi xulq-atvor uchun beriladigan imtiyozlar hisobga olingan holda, ushbu fuqarolarning jazo muddati 2030-yilda yakunlanishi kutilmoqda.
Hozirda ular Malayziyaning Selangor shtatidagi Kajang qamoqxonasida jazo muddatini o‘tamoqda. O‘zbekistonning Malayziyadagi elchixonasi tomonidan ular bilan muntazam konsullik uchrashuvlari o‘tkazilib, zarur konsullik-huquqiy yordam ko‘rsatib kelinayotgani bildirildi.
Tashqi ishlar vazirligi xorijda bo‘lib turgan O‘zbekiston fuqarolarining huquq va qonuniy manfaatlarini himoya qilish bo‘yicha zarur choralarni bundan buyon ham davom ettirishini ma’lum qildi.
