O‘zbekistonda ov qilish taqiqlangan kamyob hayvonlar ro‘yxati tasdiqlandi
1-avgustdan ayrim kamyob va yo‘qolib ketish xavfi yuqori bo‘lgan yovvoyi hayvonlarni ovlashga vaqtinchalik taqiq joriy etiladi. Cheklov 2028-yil 1-yanvarga qadar amal qiladi.
O‘zbekistonda kamyob va yo‘qolib ketish xavfi yuqori bo‘lgan ayrim yovvoyi hayvonlarni ovlashga vaqtinchalik taqiq joriy etiladi. Bu hukumatning 30-iyun kuni qabul qilingan tegishli qarorida belgilandi.
Qarorga ko‘ra, taqiq 2026-yil 1-avgustdan 2028-yil 1-yanvargacha amal qiladi hamda hukumat qarori ilovasida keltirilgan yovvoyi hayvonlar turlariga nisbatan tatbiq etiladi.
Bunda cheklov fermalar, pitomniklar, inkubatorlar, baliqchilik pitomniklari va hovuz xo‘jaliklarida saqlanayotgan yoki yetishtirilayotgan yovvoyi hayvonlarga, shuningdek, ilmiy va tibbiy maqsadlarda ovlash holatlariga nisbatan qo‘llanilmaydi.
Shuningdek, qaror bilan ov qilish taqiqlangan kamyob va yo‘qolib ketish xavfi yuqori bo‘lgan yovvoyi hayvonlar uchun ov kvotalarini ajratish ham taqiqlandi.
Hujjatda suv bioresurslarini tiklash bo‘yicha qo‘shimcha choralar ham nazarda tutilgan. Xususan, 2026-yil 1-avgustdan 2030-yil 1-yanvarga qadar respublikaning markaziy shaharlaridan oqib o‘tuvchi daryo va soylarga har yili kamida 15 tonna baliq chavog‘i qo‘yib yuboriladi.
Mazkur ishlar Ekologiya va iqlim o‘zgarishi milliy qo‘mitasi hamda Fanlar akademiyasi tomonidan shakllantiriladigan ro‘yxat asosida amalga oshiriladi.
Bundan tashqari, Ekologiya va iqlim o‘zgarishi milliy qo‘mitasiga noqonuniy ov va brakonerlikka qarshi nazoratni kuchaytirish, manfaatdor vazirlik va idoralarga esa qaror ijrosini ta’minlash vazifasi yuklatildi.
