Prezident bilan uchrashgan yosh ixtirochi qiz Volkswagen elektromobili bilan taqdirlandi
Yoshlar kuni munosabati bilan “Kelajak muhandislari” xalqaro festivali g‘olibi Ayzada Asanova Prezident sovg‘asini qabul qilib oldi.
30-iyun — Yoshlar kuni munosabati bilan Toshkentdagi Olimpiya shaharchasida o‘tkazilgan bayram tadbiri doirasida Yoshlarning tashabbuslarini qo‘llab-quvvatlash ofisi tomonidan Prezident Shavkat Mirziyoyevga bir qator innovatsion loyihalar taqdim etildi.
Taqdimot davomida iqtidorli yoshlar ilmiy ishlanmalari, muhandislik loyihalari va innovatsion g‘oyalarini namoyish etdi. Xususan, No‘monjon Ibrohimov “Kelajak muhandislari” xalqaro festivali natijalari hamda mamlakatda muhandislik sohasida amalga oshirilayotgan ishlar haqida ma’lumot berdi.
FPV dronlar poygasi bo‘yicha 2024–2025-yillar O‘zbekiston chempioni Biloliddin Ismoilov tomonidan “Shunqor-8” va “X1” antidron tizimlarini yaratish hamda takomillashtirish bo‘yicha amalga oshirilgan ishlanmalar taqdim etildi.
Shuningdek, Diyora Kurmayeva oliy ta’lim muassasalarida “Fudomika va metabolomika” ta’lim yo‘nalishini hamda maxsus ilmiy laboratoriyani tajriba tariqasida tashkil etish bo‘yicha o‘z taklifini bildirdi.
Tadbir yakunida “Kelajak muhandislari” xalqaro festivali doirasidagi “Yangi avlod avtomobillari” yo‘nalishi g‘olibi Ayzada Asanova Prezident sovg‘asi — Volkswagen elektromobili bilan taqdirlandi. Shuningdek, u Belgiyada bo‘lib o‘tadigan xalqaro tanlovda ishtirok etish uchun yo‘llanmani ham qo‘lga kiritdi.
