Samarqandda ota sudga chaqirilgach, 25 mln aliment to‘ladi
Bungacha qarzdor aliment mablag‘larini belgilangan miqdorda emas, kam-ko‘st to‘lab kelgan.
Fuqarolik ishlari bo‘yicha Kattaqo‘rg‘on tumanlararo sudining 2023 yil 8 sentyabrdagi sud buyrug‘iga asosan qarzdor X.A.dan undiruvchi G.A. foydasiga ikki nafar farzandining moddiy taʼminoti uchun farzandlari voyaga yetguniga qadar har oyda ish haqi va boshqa daromadlarining uchdan bir qismi miqdorida aliment undirish belgilangan.
Qarzdor aliment mablag‘larini belgilangan miqdorda emas, kam-ko‘st to‘lab kelgan. Natijada 2026 yil iyun oyiga qadar jami 24 million 403 ming 614 so‘m miqdorida aliment qarzdorligi yuzaga kelgan.
Qarzdorning qarzdorlikni ixtiyoriy ravishda qoplashdan bo‘yin tovlaganligi sababli, 2026 yil 24 iyun kuni unga nisbatan O‘zbekiston Respublikasi Maʼmuriy javobgarlik to‘g‘risidagi kodeksining 47-4-moddasiga asosan maʼmuriy huquqbuzarlik to‘g‘risida bayonnoma rasmiylashtirilib, ish ko‘rib chiqish uchun Jinoyat ishlari bo‘yicha Kattaqo‘rg‘on shahar sudiga yuborilgan.
Sud muhokamasi jarayonida qarzdor X.A. undiruvchi G.A. foydasiga 25 million so‘m miqdoridagi aliment mablag‘ini to‘liq to‘lagan. Shu munosabat bilan maʼmuriy ish taraflarning yarashuvi asosida tugatilgan.
