AQShda 16 nafar bolani bitta xonada dahshatli sharoitda saqlagan to‘rt kishi hibsga olindi
18 oylikdan 18 yoshgacha bo‘lgan bolalarning yetti nafari shifoxonaga yotqizilgan.
AQShning Ogayo shtatida 16 nafar voyaga yetmagan bolani yillar davomida og‘ir va antisanitariya sharoitida saqlaganlikda gumon qilingan to‘rt nafar oila a’zosi hibsga olindi deb xabar beradi Associated Press mahalliy huquqni muhofaza qilish organlariga tayanib.
Mahalliy huquqni muhofaza qiluvchi organlar ma’lumotiga ko‘ra, 30-iyun kuni Hamden qishlog‘idagi xonadonlardan birida o‘tkazilgan tintuv davomida yoshi 18 oylikdan 18 yoshgacha bo‘lgan 16 nafar bola topilgan.
Dastlabki ma’lumotlarga ko‘ra, bolalar uzoq vaqt davomida antisanitariya holatidagi uyda, asosan bitta xonada saqlangan. Ayrim voyaga yetmaganlarning sog‘lig‘i og‘ir ahvolda bo‘lib, yetti nafari shifoxonaga yotqizilgan, ulardan ikki nafari vertolyot orqali travmatologiya markazlariga yetkazilgan. Yana bir bolaning ahvoli og‘irligi sababli sun’iy nafas oldirish apparatiga ulangan.
Tergov davomida bolalarning maktabga qatnamagani, rasmiy ro‘yxatdan o‘tkazilmagani hamda oiladan tashqaridagi deyarli hech kim ularning mavjudligidan xabardor bo‘lmagani aniqlangan.
Mazkur holat yuzasidan ota-onalar hamda bobo-buvilar bolalar hayoti va sog‘lig‘iga xavf tug‘dirishda ayblanmoqda. Huquq-tartibot organlari ushbu ish odam savdosi bilan emas, oiladagi zo‘ravonlik holati bilan bog‘liqligini ma’lum qilgan.
Hozirda tergov ishlari davom etmoqda. Rasmiylar qutqarilgan barcha bolalarni davlat vasiyligiga olish choralarini ko‘rmoqda.
