O‘zbekiston va Gruziya qo‘shma turizm loyihalarini amalga oshiradi

 

O‘zbekiston Turizm qo‘mitasi raisi Abdulaziz Aqqulov boshchiligidagi delegatsiyaning Gruziyaga rasmiy tashrifi doirasida Gruziya Milliy turizm ma’muriyati rahbari Maya Omiadze bilan uchrashuv bo‘lib o‘tdi.

 

Muloqot davomida tomonlar O‘zbekiston va Gruziya o‘rtasida turizm sohasidagi hamkorlikni yanada rivojlantirish, o‘zaro sayyohlar oqimini ko‘paytirish, qo‘shma turizm mahsulotlarini yaratish hamda ularni xalqaro bozorda birgalikda targ‘ib etish masalalarini muhokama qildi.

 

Uchrashuvda turizm statistikasini yuritish bo‘yicha ilg‘or tajribalarni o‘rganish ham kun tartibidan o‘rin olgan. Xususan, kirish va ichki turizm statistikasini shakllantirish, aeroportlar hamda chegara o‘tish punktlarida sayyohlar o‘rtasida tanlanma so‘rovlar o‘tkazish metodologiyasi yuzasidan tajriba almashish bo‘yicha hamkorlikni yo‘lga qo‘yish rejalashtirilgan.

 

Tomonlar kirish turizmini rag‘batlantirishning zamonaviy mexanizmlari, jumladan, soliq imtiyozlari orqali turizm biznesini qo‘llab-quvvatlash masalalarini ham muhokama qildi. O‘zbekiston tomoni Gruziyada muvaffaqiyatli qo‘llanib kelinayotgan turoperatorlar uchun qo‘shilgan qiymat solig‘ini qaytarish va nol stavkani qo‘llash amaliyotini o‘rganishga qiziqish bildirgan.

 

Shuningdek, tog‘, enoturizm va gastronomik turizm yo‘nalishlarida hamkorlikni rivojlantirish, ekspertlar almashinuvini yo‘lga qo‘yish hamda gruziyalik mutaxassislarni O‘zbekistonda amalga oshirilayotgan istiqbolli loyihalarga maslahatchi sifatida jalb etish imkoniyatlari yuzasidan fikr almashildi.

 

Muzokaralar davomida ommaviy axborot vositalari vakillari, blogerlar va jamoatchilik fikri yetakchilari uchun o‘zaro press-turlar tashkil etish, shuningdek, O‘zbekiston va Gruziyada o‘tkaziladigan yirik xalqaro turizm ko‘rgazmalari, forumlar hamda boshqa nufuzli tadbirlarda muntazam ishtirok etish bo‘yicha kelishuvga erishildi.

 

Uchrashuv yakunida tomonlar o‘zaro sayyohlar almashinuvini ko‘paytirish, milliy turizm mahsulotlarini xalqaro bozorda faol targ‘ib qilish, qo‘shma loyihalarni amalga oshirish hamda uzoq muddatli va o‘zaro manfaatli hamkorlikni izchil rivojlantirish bo‘yicha amaliy ishlarni davom ettirishga kelishib oldi.