O‘zbekiston–Gruziya turizm aloqalari yangi bosqichga chiqmoqda
Gruziya turizm kompaniyalari noyabr oyida bo‘lib o‘tadigan “Toshkent xalqaro turizm ko‘rgazmasi”da ishtirok etishga taklif qilindi.
O‘zbekiston Turizm qo‘mitasi raisi Abdulaziz Aqqulov Gruziya Turizm assotsiatsiyasi raisi Natalya Kvachantradze hamda mamlakatning yetakchi turizm kompaniyalari vakillari bilan uchrashuv o‘tkazdi. Bu haqda qo'mita matbuot xizmati xabar berdi.
Muloqot davomida ikki davlat o‘rtasidagi turizm sohasidagi hamkorlikni yanada rivojlantirish, turoperatorlar o‘rtasida tizimli aloqalarni yo‘lga qo‘yish, Gruziya bozorida O‘zbekistonning turizm salohiyatini keng targ‘ib qilish hamda Gruziyaga tashrif buyurayotgan xorijiy sayyohlarni O‘zbekistonga jalb etish masalalari muhokama qilindi.
Tomonlar xalqaro turizm ko‘rgazmalari va forumlari doirasida muntazam B2B uchrashuvlarini tashkil etish, Gruziya turoperatorlariga O‘zbekistondagi ishonchli hamkorlarni biriktirish hamda biznes aloqalarini mustahkamlash yuzasidan fikr almashdi.
Shuningdek, Samarqand, Buxoro, Xiva, Toshkent hamda Buyuk Ipak yo‘li bo‘ylab yangi sayohat dasturlarini ishlab chiqish, ularni Gruziya bozoriga taklif etish, madaniy, gastronomik, eno va ekologik turizm yo‘nalishlarida zamonaviy turizm mahsulotlarini yaratish masalalariga alohida e’tibor qaratildi.
Muzokaralar yakunida O‘zbekiston va Gruziya turoperatorlarining o‘zaro tanishtiruv tashriflarini tashkil etish, turagentlar uchun seminar, taqdimot va workshoplar o‘tkazish bo‘yicha kelishuvga erishildi. Xususan, joriy yilning avgust oyida Gruziyaning yetakchi turoperatorlari va turagentlari uchun O‘zbekistonga maxsus info-tur tashkil etilishi rejalashtirildi.
Bundan tashqari, Gruziya Turizm assotsiatsiyasi hamda mamlakatning yetakchi turizm kompaniyalari joriy yil noyabr oyida o‘tkaziladigan “Toshkent xalqaro turizm ko‘rgazmasi”da ishtirok etishga taklif qilindi.
Qayd etilishicha, mazkur tashabbuslar O‘zbekiston va Gruziya o‘rtasidagi turizm aloqalarini yanada mustahkamlash, sayyohlar almashinuvini ko‘paytirish, yangi turizm yo‘nalishlarini rivojlantirish hamda ikki mamlakat turizm biznesi o‘rtasida uzoq muddatli va barqaror hamkorlikni kengaytirishga xizmat qiladi.
