Pokistondagi kuchli yomg‘irlar oqibatida kamida 14 kishi halok bo‘ldi
Musson mavsumi og‘ir talafotlarga sabab bo‘lib, suv toshqini xavfini kuchaytirilgan.
Pokistonda davom etayotgan kuchli musson yog‘inlari oqibatida kamida 14 kishi halok bo‘ldi, o‘nlab fuqarolar turli darajadagi tan jarohatlari oldi. Bu haqda Dunya News ma’lum qildi.
Ma’lumotlarga ko‘ra, noqulay ob-havo mamlakatning bir qator hududlarida vayronagarchiliklarni keltirib chiqargan. Xususan, Xayber Paxtunxva viloyatidagi Sayfulloh ko‘lida sayyohlarni olib ketayotgan qayiq ag‘darilib, olti kishi halok bo‘lgan.
Panjob va Attok hududlarida turar joy binolarining devorlari hamda tomlari qulashi oqibatida bir necha fuqaro hayotdan ko‘z yumgan. Shuningdek, ayrim hududlarda chaqmoq urishi oqibatida ham o‘lim holatlari qayd etilgan.
Landi Kotalda chaqmoq urishi oqibatida ikki nafar bola halok bo‘lgan, yana to‘rt kishi jarohat olgan. Yuqori Dir tumanida esa momaqaldiroq sabab 20 nafar madrasa talabasi tan jarohati olgan. Job hududida tom qulab tushishi oqibatida bir ayol va bir bola halok bo‘lgan.
Pokiston Milliy tabiiy ofatlar boshqaruvi boshqarmasi Gilgit-Baltiston, Xayber Paxtunxva va Azad Kashmir hududlarida muzlik ko‘llarining toshishi hamda to‘satdan yuz berishi mumkin bo‘lgan suv toshqinlari xavfi yuqori ekanidan ogohlantirgan.
Ma’lumot uchun, Pokistonda har yili iyul oyidan boshlanadigan musson mavsumi sentabrgacha davom etadi. Kuchli yog‘ingarchilik qishloq xo‘jaligi uchun muhim ahamiyatga ega bo‘lsa-da, ko‘pincha yirik suv toshqinlari va boshqa tabiiy ofatlarga sabab bo‘ladi.
