Qashqadaryoda fermerga bosim o‘tkazib, pul talab qilgan ona va qiz ushlandi
Ular fermerning yer maydonini davlat zaxirasiga o‘tkazib yuborish bilan qo‘rqitgan.
Huquqni muhofaza qiluvchi organlar tomonidan o‘tkazilgan tergovga qadar tekshiruvlarda aniqlanishicha, Kitob tumanida yashovchi D.E va uning onasi H. A qo‘shni mahallada istiqomat qiluvchi fermer R. O xo‘jaligiga tegishli yer maydonidan loy g‘isht quyish maqsadida foydalanib kelayotganini bilgan.
Ular ushbu holatdan moddiy manfaat ko‘rishni ko‘zlab, o‘zaro jinoiy til biriktirib, fermerga bosim o‘tkaza boshlagan. Gumonlanuvchilar yer maydoni bo‘yicha davlat organlaridagi tanishlari orqali kadastr idorasiga murojaat qilib, uni davlat zaxirasiga o‘tkazib yuborishlari mumkinligini vaj qilib ko‘rsatgan.
Shuningdek, ular qishloq xo‘jaligi sohasidagi vakolatli organlarga murojaat qilingani va mazkur masala yuzasidan da’vo qilmaslik hamda fermerning tadbirkorlik faoliyatiga to‘sqinlik qilmaslik evaziga 5 million so‘m talab qilgan.
Qashqadaryo viloyati IIB Tezkor-qidiruv xizmati hamda Uyushgan jinoyatchilikka qarshi kurashish boshqarmasi xodimlari tomonidan o‘tkazilgan tezkor tadbir davomida D. E va H. A talab qilingan pulning 3 million so‘mini olayotgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 165-moddasi 2-qismi "v" bandi (tovlamachilik) bilan jinoyat ishi qo‘zg‘atilgan. Hozirda gumonlanuvchilarning jinoiy faoliyati va ehtimoliy sheriklarini aniqlash yuzasidan tergov hamda tezkor surishtiruv ishlari davom ettirilmoqda.
