Pokistonda yo‘lovchi avtobusi jarlikka quladi: kamida 40 kishi halok bo‘ldi
Yana 8 kishi turli darajadagi tan jarohatlari olgan.
Pokistonning Balujiston viloyatida yo‘lovchi avtobusi jarlikka qulashi oqibatida kamida 40 kishi halok bo‘ldi, yana 8 kishi turli darajadagi tan jarohatlari oldi.
Dawn gazetasi xabarlariga ko‘ra, fojia Balujiston va Xayber Paxtunxva viloyatlari chegarasidagi tog‘li hududda sodir bo‘lgan. Dastlabki ma’lumotlarga ko‘ra, avtobus Balujistonning Kvetta shahridan Xayber Paxtunxva viloyatining Peshovar shahriga yo‘l olgan.
Yo‘l davomida transport vositasiga nosozlik sabab boshqa avtobusdan yo‘lovchilar ham o‘tqazilgan. Ikki viloyat chegarasidan o‘tgach, avtobus noma’lum sababga ko‘ra boshqaruvni yo‘qotib, chuqur jarlikka qulagan.
Hodisa oqibatida kamida 40 kishi halok bo‘lgani, 8 nafar jabrlanuvchi esa shifoxonaga yotqizilgani ma’lum qilingan. Voqea joyiga qidiruv-qutqaruv hamda tez tibbiy yordam brigadalari jalb etilgan bo‘lib, murakkab tog‘li relyef qutqaruv ishlarini qiyinlashtirmoqda.
Huquqni muhofaza qiluvchi organlar yo‘l-transport hodisasi sabablarini aniqlash yuzasidan tergov harakatlarini boshlagan.
