Toshkent viloyati bojxonasida "Rahbar va yoshlar" uchrashuvi tashkil etildi
Bojxona tizimida yuqori natija ko'rsatgan bir guruh yosh xodimlar rag'batlantirildi.
Toshkent viloyati bojxona boshqarmasida "Rahbar va yoshlar" uchrashuvi tashkil etildi. Bu haqda Toshkent viloyati bojxona boshqarmasi matbuot xizmati xabar berdi.
Qayd etilishicha, bugungi kunda boshqarma shaxsiy tarkibining qariyb 30 foizini yosh xodimlar tashkil etadi. Uchrashuvda boshqarma rahbari yoshlarni kasb bayrami bilan tabriklab, ularning bilim, tashabbuskorlik va zamonaviy fikrlashi bojxona tizimi rivojining muhim omili ekanini ta'kidladi.
Shuningdek, raqamli texnologiyalar, sun'iy intellekt, xavflarni tahlil qilishning zamonaviy usullari hamda xalqaro standartlarni joriy etish jarayonida yuqori malakali yosh kadrlarga ehtiyoj tobora ortib borayotgani qayd etildi. Yosh xodimlar kelgusida bojxona tizimining turli rahbarlik lavozimlarini egallashi mumkin bo'lgan istiqbolli kadrlar ekani alohida ta'kidlandi.
Uchrashuv ochiq muloqot ruhida o'tib, yosh xodimlarning taklif va tashabbuslari tinglandi. Shuningdek, xizmat faoliyatida yuqori natijalarga erishib, fidoyilik va mas'uliyati bilan ajralib turgan bir guruh yosh xodimlar munosib taqdirlandi.
Ta'kidlanishicha, bunday uchrashuvlar yoshlarning kasbiy salohiyatini rivojlantirish, ularning tashabbuslarini qo'llab-quvvatlash hamda kelajak uchun malakali rahbar kadrlar zaxirasini shakllantirishga xizmat qiladi.
