Toshkentda 2 ming dollar pora olgan kadastr bosh inspektori ushlandi

 

Davlat xavfsizlik xizmati tomonidan Iqtisodiy jinoyatlarga qarshi kurashish departamenti hamda boshqa huquqni muhofaza qiluvchi organlar bilan hamkorlikda o‘tkazilgan tezkor tadbirlar davomida Toshkent va Andijon viloyatlarida korrupsiya bilan bog‘liq ikki noqonuniy holat fosh etildi. Bu haqda DXX Zamon.uz' ga ma'lum qildi.

 

Aniqlanishicha, DXXning “Call-markazi”ga kelib tushgan murojaat asosida o‘tkazilgan tezkor tadbirda Kadastr agentligining Toshkent shahri Yashnobod tumani bo‘limi bosh inspektori uchinchi shaxs orqali 2 ming AQSH dollari olayotgan vaqtida ushlandi.

 

Ma’lum bo‘lishicha, mansabdor mahalliy fuqaro tomonidan noqonuniy o‘rnatilgan yengil konstruksiyali qurilmalarni buzdirib tashlamaslik hamda unga nisbatan ma’muriy jarima qo‘llamaslik evaziga mazkur pul mablag‘ini talab qilgan.

 

Yana bir holatda esa Andijon shahrida yashovchi 1984-yilda tug‘ilgan fuqaro xaridorga Andijon tumanidagi Xakan sanoat hududida joylashgan, davlat zaxirasidagi 40 sotix yer maydonini go‘yoki “E-auksion” orqali yutib olganini bildirgan. Shuningdek, kadastr tizimidagi tanishlari orqali mazkur yer maydonini uning nomiga rasmiylashtirib berishni va’da qilib, buning evaziga 160 ming AQSH dollari talab qilgan.

 

DXX, Ichki ishlar organlari hamda Iqtisodiy jinoyatlarga qarshi kurashish departamenti xodimlari hamkorligida o‘tkazilgan tezkor tadbirda u oldindan 80 ming AQSH dollari olayotgan vaqtida ashyoviy dalillar bilan qo‘lga olingan.

 

Hozirda har ikki holat yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.