AQSHdagi savdo markazida yuz bergan otishmada ikki kishi halok bo‘ldi
Ma’lumotlarga ko‘ra, qurolli mojaro bir-birini tanigan ikki guruh yoshlar o‘rtasidagi janjal oqibatida yuzaga kelgan.
AQSHning Michigan shtati Dirborn shahridagi Fairlane Town Center savdo markazida sodir bo‘lgan otishma oqibatida ikki kishi halok bo‘ldi, yana bir kishi jarohat oldi, deb xabar berdi CBS News.
Xabarlarga ko‘ra, hodisa 3-iyul kuni mahalliy vaqt bilan soat 13:30 atrofida yuz bergan. Dastlab uch kishi o‘q jarohati olgan. Ulardan biri voqea joyida, yana biri shifoxonada vafot etgan. Jarohatlangan uchinchi shaxsga tibbiy yordam ko‘rsatilmoqda.
Politsiyasi ma’lumotiga ko‘ra, otishma bir-birini tanigan ikki guruh yoshlar o‘rtasida yuzaga kelgan janjal oqibatida sodir bo‘lgan. Dastlabki tergov natijalariga ko‘ra, mojaro vaqtida har ikki tomonda ham o‘qotar qurol bo‘lgan.
Evakuatsiya vaqtida savdo markazidan chiqib ketayotgan bir fuqaro yaqin atrofdagi avtomobil urib yuborishi oqibatida jarohat olgan. Uning ahvoli haqida rasmiy ma’lumot berilmagan.
Voqeadan so‘ng savdo markazi to‘liq evakuatsiya qilinib, tergov ishlari olib borilishi uchun vaqtincha yopilgan.
Hozircha hodisa yuzasidan hech kim hibsga olinmagan. Gumonlanuvchilar so‘roq qilinmoqda.
