Navoiyda kanalga cho‘kib ketgan ikki 15 yoshli bola halok bo‘ldi
Dastlabki ekspertizaga ko‘ra, ularning o‘limiga suv tufayli yuzaga kelgan mexanik asfiksiya sabab bo‘lgan.
Navoiy viloyatining Navbahor tumanida 2011-yilda tug‘ilgan ikki o‘smir kanalga cho‘kib ketishi oqibatida vafot etdi. Bu haqda Bosh prokuratura matbuot kotibi Hayot Shamsutdinov ma’lum qildi.
Dastlabki ma’lumotlarga ko‘ra, hodisa 2-iyul kuni soat 13:30 lar atrofida sodir bo‘lgan. Voyaga yetmagan B.R. va S.A. sinfdoshlari bilan birga “Beshrabot–Konimex” kanalining “Yangiobod” mahallasi Bunyodkor ko‘chasidan oqib o‘tuvchi qismiga cho‘milish uchun borgan. Oqibatda ikki o‘smir suvga cho‘kib, halok bo‘lgan.
Tergovga qadar o‘tkazilgan tekshiruv davomida hodisada jinoyat alomatlari aniqlanmagan.
Sud-tibbiy ekspertizasining dastlabki xulosasiga ko‘ra, o‘smirlarning o‘limiga yuqori nafas yo‘llarining suv bilan berkilishi oqibatida yuzaga kelgan mexanik asfiksiya sabab bo‘lgan bo‘lishi mumkin.
Shuningdek, tekshiruv jarayonida “Hududiy elektr tarmoqlari” Navbahor tuman bo‘limi mutaxassislari ishtirokida kanal bo‘yidagi dehqonchilik uchun foydalanilgan suv nasosi tekshirildi. Nasos ishchi holatda suvga tushirilganda kanalda elektr toki mavjud emasligi aniqlangan.
Hozirda mazkur holat yuzasidan Navbahor tuman prokuraturasi tomonidan tergovga qadar tekshiruv harakatlari davom ettirilmoqda.
