Ohangaronda daladagi xufiya joydan sintetik narkotikni olgan xorijlik ushlandi
Xorijlikning Toshkentdagi vaqtincha yashash xonadonidan elektron tarozilar va boshqa ashyoviy dalillar musodara qilindi.
“Xavfsiz va sog‘lom yurt” tezkor-profilaktik tadbirlari doirasida Davlat xavfsizlik xizmati, Ichki ishlar vazirligi hamda Bojxona organlari xodimlari hamkorligida Toshkent viloyatining Ohangaron tumanida o‘tkazilgan tezkor tadbirda sintetik giyohvandlik vositalarining noqonuniy muomalasiga chek qo‘yildi. Bu haqda DXX ma'lum qildi.
Tezkor tadbir davomida Yaqin Sharq davlatlaridan birining 1994-yilda tug‘ilgan fuqarosi dala maydonidagi yashirin joydan 970 gramm “Mefedron” sintetik giyohvandlik vositasini qazib olib ketayotgan vaqtida qo‘lga olingan.
Shundan so‘ng tezkor tadbir davom ettirilib, ushbu shaxsning Toshkent shahrining Mirzo Ulug‘bek tumanidagi vaqtincha yashash xonadoni ko‘zdan kechirilgan. Natijada u yerdan 2 dona elektron tarozi, termoizolenta va giyohvand moddalarni qadoqlashda foydalanilishi mumkin bo‘lgan boshqa buyumlar ashyoviy dalil sifatida olib qo‘yilgan.
Hozirda mazkur holat yuzasidan dastlabki surishtiruv ishlari olib borilmoqda.
