O‘zbekiston va Qozog‘iston atmosfera havosi sifatini yaxshilash bo‘yicha hamkorlikni kuchaytiradi
Ikki davlat “Toza havo” loyihasi doirasida qo‘shma ilmiy ishchi guruh tuzish va atmosfera monitoringini takomillashtirishni rejalashtirmoqda.
Toshkentdagi Markaziy Osiyo atrof-muhit va iqlim o‘zgarishini o‘rganish universitetida (Green University) O‘zbekiston va Qozog‘iston vakillari ishtirokida atmosfera havosini muhofaza qilish hamda uning sifatini yaxshilashga bag‘ishlangan uchrashuv bo‘lib o‘tdi.
Muzokaralarda atmosfera havosi monitoringini takomillashtirish, transchegaraviy havo ifloslanishini kamaytirish hamda bu boradagi ilmiy tadqiqotlarni kengaytirish masalalari muhokama qilindi.
Qayd etilishicha, mazkur uchrashuv 2026-yil 11-aprel kuni Buxoro shahrida O‘zbekiston Prezidenti Shavkat Mirziyoyev va Qozog‘iston Prezidenti Qosim-Jomart Toqayev o‘rtasida erishilgan kelishuvlarning amaliy davomi bo‘ldi. Davlat rahbarlari o‘shanda chegaraoldi hududlarda “Toza havo” qo‘shma loyihasini amalga oshirish muhimligini ta’kidlagan edi.
Uchrashuvda O‘zbekiston tomonidan Ekologiya va iqlim o‘zgarishi milliy qo‘mitasi, Iqlim o‘zgarishi milliy markazi, Gidrometeorologiya xizmati agentligi hamda ilmiy muassasalar vakillari, Qozog‘iston tomonidan esa Ekologiya va tabiiy resurslar vazirligi, “Kazgidromet” va Milliy gidrometeorologiya xizmati mutaxassislari ishtirok etdi.
Tomonlar atmosfera havosi monitoringi natijalari, atmosfera sirkulyatsiyasi jarayonlari hamda PM2.5 va PM10 mayda dispers zarrachalari bo‘yicha olib borilgan ilmiy tadqiqotlar yuzasidan o‘zaro axborot almashdi.
Muhokamalar davomida atmosfera havosi davlat chegaralarini tan olmasligi, shu bois O‘zbekiston va Qozog‘istonning chegaraoldi hududlarida ifloslanishni kamaytirish uchun muvofiqlashtirilgan ilmiy tadqiqotlar va amaliy choralar zarurligi ta’kidlandi.
Yig‘ilish yakunida transchegaraviy atmosfera ifloslanishini kamaytirishga qaratilgan qo‘shma ilmiy ishchi guruhni tashkil etish hamda amaliy tadbirlarni muntazam amalga oshirish bo‘yicha kelishuvga erishildi.
Tashrif doirasida Qozog‘iston delegatsiyasi O‘zbekistonda “Toza havo” umummilliy loyihasi doirasida amalga oshirilayotgan ishlar bilan tanishdi. Xususan, Toshkent viloyatidagi issiqxonalarni ko‘chirish ishlari, Toshkent issiqlik elektr stansiyasida joriy etilgan zamonaviy gaz tozalash tizimlari hamda avtotransport vositalari uchun ekologik stikerlar berish mexanizmi namoyish etildi.
