Sergelida “Aqlli tuman” platformasi ishga tushirildi
Sun’iy intellekt asosidagi tizim ijtimoiy muammolar monitoringi, murojaatlar nazorati va jamoat xavfsizligini boshqarish imkonini beradi.
Prezident Shavkat Mirziyoyev Toshkent shahrining Sergeli tumani hokimligiga tashrif buyurib, hududda raqamlashtirish va davlat xizmatlarini zamonaviy boshqarish yo‘nalishida amalga oshirilayotgan ishlar bilan tanishdi.
Davlat rahbariga hokimlik binosida “yagona darcha” tamoyili asosida yo‘lga qo‘yilgan xizmatlar haqida ma’lumot berildi. Hozirda tuman hokimligi bilan bir qatorda yana beshta tashkilot faoliyat yuritib, aholi va tadbirkorlarga 30 dan ortiq davlat xizmati ko‘rsatilmoqda.
Shuningdek, Ichki ishlar vazirligiga onlayn murojaat qilish imkonini beruvchi zamonaviy qurilma taqdim etildi. Mazkur tizim orqali fuqarolar videomuloqot orqali murojaat yuborishi, murojaat avtomatik ro‘yxatga olinishi hamda xizmat sifati yuzasidan baho berishi mumkin.
Prezident bunday “aqlli” qurilmalarni aholi gavjum hududlar, bozorlar va boshqa jamoat joylarida kengroq joriy etish bo‘yicha topshiriq berdi.
Tashrif davomida davlat rahbari sun’iy intellekt asosida ishlovchi “Aqlli tuman” platformasi va vaziyatlar markazi faoliyati bilan ham tanishdi. Mazkur markaz 17 ta axborot tizimini o‘zaro integratsiya qilgan bo‘lib, ijtimoiy va kommunal muammolar monitoringi, aholi murojaatlari ijrosini nazorat qilish hamda favqulodda vaziyatlarda tegishli xizmatlar faoliyatini muvofiqlashtirish imkonini beradi.
Vaziyatlar markazi 46 ta mahalla bilan videokonferensaloqa orqali bog‘langan, shuningdek, tumandagi 25 ta maktab ham ushbu tizimga bosqichma-bosqich integratsiya qilinmoqda.
Platforma tarkibidagi “Xavfsiz tuman” tizimi jamoat xavfsizligini ta’minlash va huquqbuzarliklarning oldini olishga xizmat qilsa, tadbirkorlik subyektlarining raqamli xaritasi sun’iy intellekt asosida soliq tushumlarini prognoz qilish imkonini beradi. “AI Davomat” tizimi esa maktablarda dars qoldirish holatlarini nazorat qilish va voyaga yetmaganlar o‘rtasida nazoratsizlikning oldini olishga qaratilgan.
Prezident ushbu tajribani Toshkent shahrining boshqa tumanlarida ham joriy etish bo‘yicha topshiriq berdi.
Shuningdek, tashrif davomida poytaxtda ta’lim tizimi va qurilish sohasini raqamlashtirish, yashirin iqtisodiyotni qisqartirish, soliqlar yig‘iluvchanligini oshirish hamda jamoat xavfsizligini ta’minlash bo‘yicha mas’ullarning hisobotlari eshitildi.
