Sergelidagi yangi tibbiyot markazida 250 ta ish o‘rni yaratildi
Shavkat Mirziyoyev yiliga 150 ming nafardan ortiq bemorga xizmat ko‘rsatadigan zamonaviy xususiy tibbiyot markazi faoliyati bilan tanishdi.
Prezident Shavkat Mirziyoyev Toshkent shahrining Sergeli tumanida joylashgan “Global International Hospital” xususiy ko‘p tarmoqli tibbiyot markazi faoliyati bilan tanishdi.
Qayd etilishicha, markazni barpo etish uchun 30 million AQSH dollari miqdorida investitsiya yo‘naltirilgan. Zamonaviy tibbiyot muassasasi yiliga 150 ming nafardan ortiq aholiga xizmat ko‘rsatish imkoniyatiga ega bo‘lib, yillik xizmatlar hajmini 15 milliard so‘mga yetkazish rejalashtirilgan.
Davlat rahbariga markaz faoliyati yuzasidan taqdimot o‘tkazildi. Prezidentimiz jarrohlik, reanimatsiya, davolash bo‘limlari hamda situatsion markazda yaratilgan sharoitlar bilan tanishdi.
Loyiha doirasida 250 ta yangi ish o‘rni yaratilgan. Muassasada xorijda malaka oshirgan yuqori malakali mutaxassislar hamda chet ellik shifokorlar faoliyat yuritmoqda.
Tibbiyot markazi Buyuk Britaniya, Italiya va Germaniyadan olib kelingan zamonaviy uskunalar, jumladan, PHILIPS kompaniyasining ilg‘or tibbiy texnologiyalari bilan jihozlangan.
Prezident Shavkat Mirziyoyev markazni ayrim yo‘nalishlar bo‘yicha tayanch tibbiyot muassasasiga aylantirish, bu yerda to‘plangan ilg‘or tajribani shifokorlar malakasini oshirish va zamonaviy tibbiy xizmatlarni kengaytirishda samarali qo‘llash zarurligini ta’kidladi.
Davlat rahbari markaz xodimlari bilan muloqot chog‘ida xususiy tibbiyot tizimini rivojlantirish, aholiga sifatli tibbiy xizmat ko‘rsatish hamda tibbiy xizmatlarni turizm bilan uyg‘unlashtirish masalalariga alohida e’tibor qaratdi.
Shuningdek, shifoxonalar huzurida mehmonxona infratuzilmasini rivojlantirish va xorijiy tajribani joriy etish bo‘yicha mutasaddilarga tegishli topshiriqlar berildi.
