Surxondaryoda “o‘zbek-afg‘on” chegarasidan 2,5 kilogrammdan ortiq opiy musodara qilindi
Shuningdek, Toshkentda o‘tkazilgan tezkor tadbirda qariyb 3 kilogramm ko‘knori boshoqlari aniqlandi.
Davlat xavfsizlik xizmati tomonidan giyohvandlik vositalarining noqonuniy aylanmasiga qarshi kurashish doirasida Surxondaryo viloyati va Toshkent shahrida tezkor tadbirlar o‘tkazildi. Bu haqda DXX Zamon.uz' ga xabar berdi.
Ma’lum qilinishicha, DXXning Surxondaryo viloyati bo‘yicha boshqarmasi xodimlari hamda Chegara qo‘shinlari harbiy xizmatchilari hamkorligida o‘tkazilgan tadbir davomida O‘zbekiston–Afg‘oniston davlat chegarasining Termiz tumani hududidan o‘tuvchi qismida noma’lum shaxslar tomonidan qoldirib ketilgan 2 kilogramm 562 gramm opiy giyohvandlik vositasi aniqlanib, belgilangan tartibda musodara qilingan.
Mazkur holat yuzasidan jinoyat ishi qo‘zg‘atilib, giyohvandlik vositasining egalarini aniqlash bo‘yicha tezkor-qidiruv tadbirlari olib borilmoqda.
Shuningdek, “Xavfsiz va sog‘lom yurt” tezkor-profilaktik tadbirlarining ikkinchi bosqichi doirasida DXXning Toshkent shahar bo‘yicha boshqarmasi hamda poytaxt IIBB xodimlari hamkorligida o‘tkazilgan tezkor tadbirda Chilonzor tumanida yashovchi 1974-yilda tug‘ilgan fuqaroning xonadonidan 2 kilogramm 930 gramm ko‘knori boshoqlari topilib, protsessual tartibda olib qo‘yilgan.
Hozirda ushbu holat yuzasidan dastlabki surishtiruv ishlari davom ettirilmoqda.
