Toshkentda 230 ta mahallada yarim yilda birorta ham jinoyat sodir etilmadi
Sergelida 29 ta mahalla “yashil” toifaga o‘tdi, 17 ta mahallada umuman jinoyat qayd etilmadi.
Prezident Shavkat Mirziyoyev raisligida o‘tkazilgan videoselektor yig‘ilishida Toshkent shahrida mahallalarda xavfsiz muhitni ta’minlash va jinoyatchilikning oldini olish borasidagi ishlar muhokama qilindi.
Yig‘ilishda poytaxt tumanlariga respublika rahbarlari biriktirilgani natijasida jamoat xavfsizligini ta’minlash bo‘yicha ijobiy o‘zgarishlarga erishilgani qayd etildi.
Ma’lum qilinishicha, yilning dastlabki olti oyida oldini olish mumkin bo‘lgan jinoyatlar soni sezilarli darajada kamaygan. Xususan, 230 ta mahallada umuman jinoyat sodir etilmagan, yana 332 ta mahallada jinoyatlar keskin qisqargan.
Shuningdek, kriminogen vaziyati og‘ir deb baholangan mahallalar soni 60 tadan 23 taga kamaygani ta’kidlanib, bu poytaxtda jamoat xavfsizligini ta’minlash bo‘yicha joriy etilgan yangi yondashuvlar o‘z samarasini berayotganini ko‘rsatishi qayd etildi.
Sergeli tumanida ham xavfsiz muhitni ta’minlash borasida ijobiy natijalar kuzatilgani bildirildi. Ilgari kriminogen vaziyati og‘ir deb baholangan 29 ta mahalla “yashil” toifaga o‘tkazilgan, 17 ta mahallada esa birorta ham jinoyat sodir etilmagan.
Qayd etilishicha, Sergeli tumani bu borada Toshkent shahridagi tumanlar orasida eng yaxshi natijalardan birini ko‘rsatgan.
Davlat rahbari O‘zgarish mahallasida yo‘lga qo‘yilgan profilaktika ishlarini boshqa hududlarda ham ommalashtirish, tumandagi qolgan 46 ta mahallani “yashil” toifaga o‘tkazish, yashirin iqtisodiyotni qisqartirish hamda yoshlar bilan ishlashning yangi mexanizmlarini joriy etish yuzasidan mutasaddilarga topshiriqlar berdi.
Yig‘ilish yakunida hokimlar va mas’ul rahbarlarning hisobotlari eshitildi.
