Toshkentning har bir tumanida 15–20 ta zamonaviy hojatxona quriladi

 

Prezident Shavkat Mirziyoyev raisligida o‘tkazilgan videoselektor yig‘ilishida Toshkent shahrining turizm infratuzilmasini rivojlantirish, tozalikni ta’minlash va jamoat xizmatlari sifatini oshirish masalalari muhokama qilindi.

 

Qayd etilishicha, yil boshidan buyon poytaxtga qariyb 3 million nafar xorijlik sayyoh tashrif buyurgan. Ularning aksariyati tarixiy obidalar, istirohat bog‘lari, bozorlar, kafe va restoranlar hamda turistik mahallalarga piyoda sayohat qilishni afzal ko‘radi.

 

Shu munosabat bilan avtobus bekatlari, temir yo‘l vokzallari, aeroport va metro bekatlarida sayyohlar uchun shahar bo‘ylab harakatlanish marshrutlarini ko‘rsatuvchi, mobil telefonlarga bepul va qulay yuklab olinadigan raqamli xaritalarni joriy etish bo‘yicha topshiriqlar berildi.

 

Yig‘ilishda Toshkentning toza, ozoda va yashil shahar sifatidagi nufuzi saqlab qolinishi zarurligi alohida ta’kidlandi. Ko‘chalar, xiyobonlar va bog‘lardagi tozalik darajasi aholi hamda sayyohlar ehtiyojlari nuqtai nazaridan tanqidiy tahlil qilindi.

 

Davlat rahbari tozalik faqat obodonlashtirish emas, balki madaniyat va qadriyat masalasi ekanini qayd etdi. Mahalla raislari, nuroniylar va faollarga aholi bilan birgalikda obodonlashtirish, daraxt ekish va parvarishlash ishlarini kuchaytirish hamda yoshlarda “Tozalik ostonadan boshlanadi” degan qadriyatni shakllantirish zarurligi ta’kidlandi.

 

Shuningdek, poytaxtda jamoat hojatxonalari yetishmasligi muammosiga e’tibor qaratildi. Mutasaddilarga bir oy muddatda alohida dastur ishlab chiqish hamda joriy yilning o‘zida Toshkentning har bir tumanida 15–20 tadan zamonaviy jamoat hojatxonasi qurish uchun yer maydonlarini auksionga chiqarish vazifasi yuklatildi.

 

Bundan tashqari, poytaxt bo‘ylab chiqindi qutilari sonini keskin ko‘paytirish bo‘yicha ham zarur choralar ko‘rilishi belgilandi.