Yangi Sergeli koʻchasida yangi savdo va xizmat koʻrsatish infratuzilmasi barpo etildi

 

Shavkat Mirziyoyev 4-iyul kuni Toshkent shahrining Sergeli tumanidagi Ittifoq mahallasida joylashgan Yangi Sergeli ko‘chasida barpo etilgan savdo va xizmat ko‘rsatish infratuzilmasi faoliyati bilan tanishdi.

 

Qayd etilishicha, umumiy qiymati 18,7 milliard so‘m bo‘lgan loyiha doirasida ko‘chaning 2,1 kilometr qismi to‘liq rekonstruksiya qilinib, savdo, umumiy ovqatlanish, turizm va ko‘ngilochar xizmatlarni o‘z ichiga olgan 24/7 rejimida faoliyat yuritadigan zamonaviy hudud tashkil etildi.

 

Loyiha doirasida aholining mazmunli hordiq chiqarishi uchun 10 dan ortiq bolalar maydonchasi, 8 ta vorkaut zonasi, kitob do‘koni hamda nuroniylar maskani barpo etilgan.

 

Mazkur hudud atrofidagi to‘rtta mahallada 21 mingdan ortiq aholi istiqomat qiladi. Yangi Sergeli ko‘chasidan kuniga o‘rtacha 15–20 mingta avtomobil harakatlanadi. Loyiha to‘liq quvvatda ishga tushgach, yiliga 1,2 milliondan ortiq tashrif buyuruvchiga xizmat ko‘rsatish imkoniyati yaratiladi.

 

Shuningdek, loyiha natijasida 250 dan ortiq yangi ish o‘rni yaratilgan, 95 ta tadbirkorlik subyekti faoliyati kengaytirildi va 22 ta yangi biznes subyekti tashkil etilgan.

 

Davlat rahbari hududdagi milliy me’moriy uslubda ta’mirlangan xonadonlar, obodonlashtirilgan ko‘chalar va aholiga yaratilgan qulayliklarni ko‘zdan kechirdi. Shuningdek, mahalla faollari va fuqarolar bilan muloqot qilib, amalga oshirilayotgan islohotlarning aholi turmush darajasi va daromadlariga ta’siri bilan qiziqdi.

 

Mahalla faollari yangi infratuzilma hudud qiyofasini tubdan o‘zgartirgani, tadbirkorlik rivojlanib, aholi bandligi va daromadlari oshayotganini ta’kidlagan.