Adabiyot muzeyi yopilmaydi, yangi binoga ko‘chiriladi — Fanlar akademiyasi
Fanlar akademiyasi Alisher Navoiy nomidagi davlat Adabiyot muzeyi faoliyati yuzasidan tarqalgan xabarlarga munosabat bildirib, muzey yangi bino foydalanishga topshirilgach o‘z ishini davom ettirishini ma’lum qildi.
O‘zbekiston Fanlar akademiyasi Alisher Navoiy nomidagi davlat Adabiyot muzeyi faoliyati yuzasidan ijtimoiy tarmoqlarda tarqalayotgan xabarlarga rasmiy munosabat bildirdi.
Qayd etilishicha, so‘nggi kunlarda muzey faoliyati bilan bog‘liq ayrim ma’lumotlar noto‘g‘ri yoki to‘liq bo‘lmagan talqinda tarqatilgani jamoatchilik orasida asossiz xavotirlarni yuzaga keltirgan.
Fanlar akademiyasi ma’lumotiga ko‘ra, muzeyda amalga oshirilayotgan ishlar muassasa faoliyatini tugatish yoki madaniy meros obyektlariga zarar yetkazishga emas, balki noyob qo‘lyozmalar, arxiv hujjatlari va eksponatlarni zamonaviy talablarga mos sharoitlarda saqlash, ularni raqamlashtirish hamda kelajak avlodlarga bexatar yetkazishga qaratilgan.
Bildirilishicha, Vazirlar Mahkamasining 2026-yil 20-maydagi 234-F-sonli farmoyishi asosida, Yangi Toshkent shahrida Adabiyot muzeyi uchun bunyod etilayotgan yangi bino foydalanishga topshirilgunga qadar muzey fondlari vaqtincha boshqa muassasalarga ko‘chirilmoqda.
Jumladan, muzey fondidagi nodir qo‘lyozmalar, toshbosma manbalar hamda “O‘zbekiston yozuvchilari va shoirlari arxivi” fondi Vazirlar Mahkamasi huzuridagi O‘zbekistondagi Islom sivilizatsiyasi markaziga, boshqa eksponatlar esa Fanlar akademiyasining Antropologiya institutiga vaqtincha saqlash uchun joylashtirilmoqda.
Ma’lumotlarga ko‘ra, 2026-yil 9-iyun kuni muzeyning 847 dona nodir qo‘lyozmasi belgilangan tartibda Islom sivilizatsiyasi markazining maxsus saqlash xonalariga ko‘chirilgan. Hozirda ushbu jarayon bo‘yicha zarur hujjatlar rasmiylashtirilmoqda.
Shuningdek, muzey fondida saqlanayotgan 1 491 dona toshbosma manba, 439 ta papkadagi foto nusxalar, 145 ta papkadagi plyonka va negativlar, shuningdek 1 416 512 ta hujjatdan iborat “O‘zbekiston yozuvchilari va shoirlari arxivi” fondi birlamchi xatlovdan o‘tkazilgani, qolgan eksponatlar inventarizatsiyasi esa davom etayotgani ma’lum qilingan.
Fanlar akademiyasi muzey tomoshabinlar va tadqiqotchilar uchun vaqtincha yopilgan bo‘lsa-da, muassasa xodimlari o‘z xizmat vazifalarini to‘liq bajarayotganini ta’kidlagan.
Rasmiy munosabatda barcha ishlar amaldagi qonunchilik va belgilangan me’yoriy tartiblar asosida, mas’ul mutaxassislar ishtirokida amalga oshirilayotgani qayd etilib, jamoatchilikdan ijtimoiy tarmoqlarda tarqalayotgan asossiz xabarlarga emas, rasmiy manbalarga tayanish so‘raldi.
