Andijonda 38,3 mlrd so‘mlik keshbek talon-toroj qilindi
94 mingdan ortiq fuqaro va ijtimoiy himoya reyestriga kiritilgan shaxslar nomidan keshbek mablag‘lari rasmiylashtirilgan.
Bosh prokuratura huzuridagi Departament tomonidan Andijon viloyatida 38,3 milliard so‘mlik byudjet mablag‘larini noqonuniy o‘zlashtirish holati aniqlandi.
Tergovga qadar tekshiruvda ma’lum bo‘lishicha, fuqaro Y. Q. va boshqa shaxslar o‘zaro til biriktirib, 5 ta MCHJ nomidan boshqa korxonalar tomonidan go‘yoki 2,2 trillion so‘mlik mahsulot yetkazib berilgani haqida soxta elektron hisob-fakturalarni rasmiylashtirgan.
Shuningdek, savdodan tushgan mablag‘lar nazorat-kassa mashinalari orqali rasmiylashtirilgandek ko‘rsatilib, xarid cheklari shakllantirilgan. Ushbu cheklarning ma’lumotlari asosida 94 ming 921 nafar fuqaro hamda ijtimoiy himoya reyestriga kiritilgan shaxslar nomidan Soliq Mobile ilovasi orqali keshbek mablag‘lari rasmiylashtirilgan.
Natijada 38,3 milliard so‘m byudjet mablag‘i o‘zlashtirish va rastrata qilish yo‘li bilan talon-toroj qilingani aniqlangan.
Mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) hamda 228-moddasi (hujjatlar, shtamplar, muhrlar, blankalarni qalbakilashtirish va ulardan foydalanish) bilan jinoyat ishi qo‘zg‘atilib, tergov harakatlari davom ettirilmoqda.
