Bektemirda giyohvand moddalarni “zakladka” usulida tarqatgan shaxslar ushlandi
Qo'lga olingan uch nafar shaxsga nisbatan jinoyat ishi qo‘zg‘atildi.
Ichki ishlar vazirligi tomonidan 1–31-iyul kunlari o‘tkazilayotgan “Xavfsiz va sog‘lom yurt” keng qamrovli tezkor-profilaktik tadbirlari doirasida Toshkent shahrining Bektemir tumanida giyohvandlik vositalari noqonuniy muomalasiga chek qo‘yildi. Bu haqda Toshkent Ichki ishlar bosh boshqarmasi matbuot xizmati xabar berdi.
Ma’lum qilinishicha, “Iyk ota” mahallasida xizmat olib borayotgan patrul-post xizmati xodimlari shubhali harakatlangan ikki nafar shaxsni xolislar ishtirokida ko‘zdan kechirgan. Natijada ularning yonidan 43 dona alohida qadoqlangan giyohvandlik moddasi aniqlanib, daliliy ashyo sifatida rasmiylashtirib olingan.
Shuningdek, Bektemir tumani Ichki ishlar organlari faoliyatini muvofiqlashtirish boshqarmasi xodimlari tomonidan o‘tkazilgan yana bir tezkor tadbirda shubhali shaxs ko‘zdan kechirilganda, undan 15 dona qadoqlangan giyohvandlik moddasi topilib, protsessual tartibda musodara qilingan.
Har ikkala holat yuzasidan Jinoyat kodeksining 273-moddasi 5-qismi bilan jinoyat ishlari qo‘zg‘atilib, gumonlanuvchilarga nisbatan qamoqqa olish tarzidagi ehtiyot chorasi qo‘llanilgan.
Ichki ishlar vazirligi “Xavfsiz va sog‘lom yurt” keng qamrovli tezkor-profilaktik tadbirlari respublika bo‘ylab davom etayotganini ma’lum qildi.
