Isroilning AQShdan tashqari ham ko‘plab do‘stlari bor — Netanyaxu

 

Isroil Bosh vaziri Benyamin Netanyaxu mamlakatning eng yaqin ittifoqchisi AQSh ekanini ta’kidlar ekan, Isroil dunyoda Qo‘shma Shtatlardan tashqari ham ko‘plab ishonchli hamkor va do‘stlarga ega ekanini ma’lum qildi.

 

U Fox News telekanaliga bergan intervyusida AQSh vitse-prezidenti J.D. Vensning Isroil AQShning yagona kuchli ittifoqchi ekanini yodda tutishi kerakligi haqidagi fikriga munosabat bildirgan.

 

“Men J.D. Vensni hurmat qilaman, munosabatlarimiz juda yaxshi. Ammo bu uning har bir fikriga qo‘shilaman degani emas. Donald Tramp Oq uyda men ko‘rgan eng buyuk do‘st. Shu bilan birga, bizning boshqa do‘stlarimiz ham bor. Masalan, 1,4 milliard aholiga ega Hindiston bizni katta qo‘llab-quvvatlaydi”, — degan Netanyaxu.

 

Bosh vazirning so‘zlariga ko‘ra, dunyoning ko‘plab davlatlari rahbarlari Isroil bilan hamkorlikni rivojlantirish istagini bildirib, muntazam aloqada bo‘lib turishadi.

 

Shu bilan birga, Netanyaxu AQSh va Isroil o‘rtasidagi strategik ittifoq o‘zgarmasligini alohida ta’kidladi.

 

“Amerikaning Isroildan muhimroq ittifoqchisi yo‘q, Isroilning esa Qo‘shma Shtatlardan muhimroq ittifoqchisi yo‘q”, — deya ta'kidlagan u.

 

Netanyaxuning bayonoti AQSh va Eron o‘rtasidagi muzokaralar hamda Vashington va Tel-Aviv o‘rtasidagi munosabatlar xalqaro muhokamalar markazida bo‘lib turgan bir paytda yangragan.