“Maxsus harbiy operatsiya” haqiqiy urushga aylandi — Peskov
Kreml matbuot kotibining ta’kidlashicha, G‘arbning Ukrainaga harbiy yordami mojaroning urush tusini olishiga sabab bo‘lgan.
Rossiya prezidenti matbuot kotibi Dmitriy Peskov Rossiyaning Ukrainadagi “maxsus harbiy operatsiyasi” endilikda “haqiqiy urush” tusini olganini ma’lum qildi. Uning fikricha, bunga G‘arb davlatlarining Ukrainani qo‘llab-quvvatlashi sabab bo‘lgan.
Peskov bu haqda VGTRK jurnalisti Pavel Zarubinga bergan intervyusida so‘zlagan.
“Urush ketyapti, bu haqiqiy urush. Hammasi maxsus harbiy operatsiya sifatida boshlangan edi. Ammo Berlin, Parij, Gaaga, Oslo va, afsuski, Vashington Kiyevni qo‘llab-quvvatlagani sabab bu urushga aylandi”, — deya ta'kidlagan u.
Kreml vakilining ta’kidlashicha, G‘arb davlatlari Ukrainaga razvedka ma’lumotlari, sun’iy yo‘ldosh tizimlari va xorijiy qurollarni nishonga yo‘naltirish orqali yordam bermoqda.
Peskov, shuningdek, Rossiya qo‘shinlari frontda “tizimli ravishda oldinga siljiyotgani” va buning natijalari ko‘rinayotganini iddao qilgan. U Kostyantinovka ustidan nazorat o‘rnatilgani haqidagi Rossiya bayonotini takrorlagan. Biroq Ukraina prezidenti Vladimir Zelenskiy avvalroq bu da’volarni rad etgan, mustaqil monitoring loyihalari ham mazkur ma’lumotni tasdiqlamagan.
Kreml matbuot kotibi Ukraina dronlari Rossiya hududidagi energetika va fuqarolik infratuzilmasi obyektlariga zarba berayotganini aytib, bunday hujumlarni “terroristik harakatlar” deb baholagan.
Rossiya 2022-yilda Ukrainaga keng ko‘lamli bostirib kirganidan buyon rasmiylar mojaro uchun “maxsus harbiy operatsiya” atamasidan foydalanib kelmoqda. Shu bilan birga, Rossiyada urushni ochiqchasiga “urush” deb atagan ayrim shaxslar, jumladan sobiq Moskva deputati Aleksey Gorinov, armiya haqida “soxta ma’lumot tarqatish” moddasi bilan jinoiy javobgarlikka tortilgan edi.
